أخبار محكمة الأسرة اليوم
محكمة الأسرة .. خلود: عايز ينام في البيت وميشتغلش
لجأت خلود لمحكمة الأسرة بعد مرات عديدة حاولت فيها الحصول على حقوقها المادية التي حرمها منها زوجها طوال سنين زواجهم، فلم يقدر أبدا على تحمل مسؤولية بيت وأسرة وفضل أن يبقى في المنزل، وتقدمت الزوجة برفع دعاوي نفقة على الزوج بالرغم من عدم انفصالهم ولكنها أرادت أن تحصل على حقوقها وحقوق أبنائها حتى يعيشوا حياة مستقرة بعدما أصبح الوضع مع زوجها لا يحتمل ولا تستيطع أن تكمل حياتها معه.
قصص محكمة الأسرة.. جوزي مكنش عايز يوضب البيت
قالت «خلود» في بداية حديثها: «أنا اتجوزت من 2018 وخلفت من جوزي ولدين كان جواز صالونات، وكان باين إنه شخص كويس ومحترم، قبل الجواز مكنش عايز يكمل الحجات اللي اتفق عليها مع أبويا ومكنش عايز يوضب البيت وعايزني أجيب كل حاجة، بس جبت على قد ما قدرت وقلت معلش يمكن ظروفه صعبة ومش قادر يجيب».
حكايات محكمة الأسرة.. بيشتغل يومين في الأسبوع
تابعت «خلود» حديثها قائلة: «اتجوزت وخلفت منه ولدين والدنيا في الأول كانت ماشية، كان مبيشتغلش غير يومين في الأسبوع وباقي الأسبوع ينام في البيت ومينزلش، الأول كان عادي وبيجيب على القد لكن بعد ما خلفنا وبقى عندنا عيال ومسؤوليات كان صعب إننا نكمل بالوضع ده».
دعاوي محكمة الأسرة.. سيبته لما لقيت ملوش لزمة
أضافت «خلود»: «حاولت معاه كتير إنه يتعدل وينزل يشتغل عشان يكفي مصاريف البيت والعيال، لكن مفيش فايدة معاه، كان بيحب ينام في البيت ومينزلش يشتغل، لحد ماتعبت منه وقررت مكملش معاه تاني لما لاقيته ملوش لزمة في حياتنا خلاص، وخدت ولادي وسيبت البيت، ومن ساعة ما مشيت معترضش ولا قال مشيت ليه».
قضايا محكمة الأسرة.. متبهدلة في المحاكم بسببه
أنهت «خلود» حديثها قائلة: «من ساعة ما سيبته وأنا متبهدلة في المحاكم، رفعت عليه في الأول قضية نفقة صغاروبعد كدة رفعت قضية نفقة زوجية لأن أحنا لسه مطلقناش، كان مبيدفعش النفقة بحجة إنه مش معاه فلوس تكفي، كان يدوبك بيدفع للولدين مصاريفهم والنفقة جزء كبير متراكم مش قادر يدفعه ورفعت عليه قضية متجمد نفقة عشان أعرف أخد حقي وهو عارف إني رافعة عليه كل القضايا دي ومبيتكلمش ومش هامه حاجة».
تابع أحدث الأخبار عبر
