أخبار محكمة الأسرة اليوم
محكمة الأسرة .. ثرية: فص ملح وداب معرفلوش طريق بقاله 15 سنة
كانت محكمة الأسرة هي المحطة الأخيرة التي توجهت لها ثرية بعد سنين الانتظار التي عاشتها على أمل في يوم من الأيام يعود زوجها لحياتها مرة أخرى بعد اختفائه بدون سبب أو مبرر، بعد زواج ثرية بـ 4 سنين تفاجئت باختفاء زوجها من على وجه الأرض ولم تعلم وقتها سبب اختفاؤه أو مكان تواجده وبعد سنين من تحملها المسؤولية وحدها تواجدت في محكمة الأسرة تبحث عن حق من حقوقها التي تم سلبها منها ولم تستطيع ردها طوال هذه السنين.
قصص محكمة الأسرة.. اتجوزت عن طريق المعارف
قالت «ثرية» في بداية حديثها: «أنا اتجوزت من 20 سنة كان جواز عن طريق المعارف أهله كانوا يعرفوا أهلي واتقدملي عن طريقهم كان شخص كويس ومحترم ومفيش منه مشاكل وافقت اتجوزه وقلت هيبقى ليا بيت وعايلة وحمدت ربنا».
حكايات محكمة الأسرة.. المصاريف كتير وهو مش قادر يكفي
تابعت «ثرية» حديثها قائلة: «بعد الجواز خلفت من جوزي ولد وبنت، وقتها المشاكل بينا بدأت بسبب المصاريف إنه المسؤولية زادت عليه وبقى مش قادر يكفي مصاريف البيت، العيال كانت مصاريفهم كتير فوق مصاريف البيت وهو مكنش قادر يكفي بس أنا كنت فاكرة إنه هيقدر يتحمل».
دعاوي محكمة الأسرة.. صحيت من النوم لقيت جوزي اختفى
أضافت الزوجة: «لحد بعد جوازنا بـ 4 سنين صحيت في يوم من النوم ملقتش جوزي في البيت ولا في أي حته، اختفى ومعرفلوش طريق دورت عليه في كل حته ومكنتش لاقياه سألت أهلي وأهله والناس كلها ومحدش فادني ولا اداني إجابة ولا ريحني كل اللي كلمه يقولي معرفش مكانه فين».
قضايا محكمة الأسرة.. جوزي بقاله 15 سنة غايب معرفلوش طريق
أنهت «ثرية» حديثها قائلة: «بقاله 15 سنة غايب ولادي كبروا ودخلوا الجامعة ودلوقتي مش فاكرين حتى أبوهم، أنا اللي اشتغلت وتعبت وصرفت عليهم وكبرتهم بمساعدة أهلي والناس الغريبة اللي كنت بصعب عليهم سنين معرفش هو فين ولا أعرف ايه السبب اللي مشي عشانه، لحد ما عرفت من أهله أنه مات وجيت أرفع قضية عشان أعرف أخد المعاش».
تابع أحدث الأخبار عبر
