أخبار محكمة الأسرة اليوم
محكمة الأسرة .. عادل: مستحملتش ظروفي وسابتني ومشيت ومبهدلاني في القضايا
كان «عادل» في محكمة الأسرة بسبب زوجته التي لم تتحمل ظروف الزوج الصعبة ، ولم تقدم يد العون لزوجها الذي كان كل ما يهمه أن يصون بيته وأسرته ويقدم لهم العون والمساعدة ويعيشوا حياة مستقرة مثل أي أسرة لكن حدثت ظروف مع الزوج اضطرته أن يترك عمله ، وعندما تخلت الزوجة عن زوجها جعل الحياة بينهم مستحيلة حتى أوصلت الزوجة زوجها ووالد ابنها لأبواب محكمة الأسرة يبحث عن حلول لمشكلته معها ويبحث عن أمل في مستقبله بعدما دمرت زوجته كل أماله.
قصص محكمة الأسرة .. مكملتش مع مراتي 6 شهور جواز
قال «عادل» في بداية حديثه: «أنا اتجوزت من سنتين خلفت من مراتي ولد واحد بس، مقعدتش مع مراتي غير حوالي 6 شهور على بعض كانت كل شوية تسيب البيت وتروح عند أهلها، كان جواز صالونات ناس عرفوني عليها وقالوا أنها بنت كويسة وبنت ناس واتقدمتلها واتجوزنا بعد فترة الخطوبة».
حكايات محكمة الأسرة .. المصاريف زادت بعد ولادة ابني
تابع «عادل» حديثه قائلا: «أول ما اتجوزنا الحياة كانت كويسة ومفيش مشاكل خالص، أنا كنت بشتغل وكان مرتبي كويس جدا وكنت مكفي البيت من كافة المصاريف، لما ابني اتولد المصاريف زادت ومبقتش قادر عليها وده بسببه حصل مشاكل كتير بيني وبين مراتي».
دعاوي محكمة الأسرة.. مستحملتش ظروفي وسابتني ومشيت
أضاف الزوج لكلامه: «لحد ما حصل ظروف واضطريت أسيب شغلي اللي كنت فيه ووقتها رحت شغل تاني بس كان مرتبه أقل من المرتب الأول اللي مكنش عاجبها أصلا، مع إن مرتبي كان لسه هيزيد الضعف لكنها مستحملتش واتلككت وخدت ابني ومشيت راحت عند أهلها».
قضايا محكمة الأسرة.. مش مخلياني أشوف ابني
أنهى «عادل» حديثه قائلا: «من وقتها وهي قاعده عند بيت أهلها بقالها 7 شهور دلوقتي وحبيت أحل ودي وترجع مش نافع مش عاجبها حاجة بدل ما تقف معايا في الظروف الصعبة اللي بمر بيها، لحد ما اكتشفت أنها من قريب رفعت عليا قضية بالقايمة بالدهب وطالبة حوالي 500 ألف، مع إني مرفضتش إني أديها أي حق من حقوقها، ولقيتها رافعة عليا قضايا نفقة عشانها وعشان الولد وأنا أصلا كنت بصرف عليهم بقالي فترة، بس هي مصممة تبهدلني ومنعاني إني أشوف ابني وجيت المحكمة عشان أعرف هي رافعة عليا قضايا قد ايه».
تابع أحدث الأخبار عبر
