أخبار محكمة الأسرة اليوم
محكمة الأسرة.. إسراء: أنا وعيالي مش لاقيين الأكل وأهله عايشين بفلوسه
توجهت إسراء نحو محكمة الأسرة من أجل رفع دعوى نفقة على والد أطفالها بعد خلافات ومشاجرات عديدة ملأت حياتها معه بسبب ضعف شخصية زوجها أمام أهله الذي جعل الحياة معه مستحيلة بسبب تحكمهم في كل تفاصيل حياتهم، حتى وصل بهم الأمر أنهم منعوا الزوج من أن يصرف على زوجته وأبنائه ما يحتاجوه، حتى اضطرت الزوجة بسبب أفعال زوجها وأهله أن تتوجه لمحكمة الأسرة حتى تحصل على حقوقها التي لم يعطيها لها زوجها حتى بعد انفصالهم ومازال تحت تأثير أهله عليه.
قصص محكمة الأسرة.. جوزي مقتدر ومعاه يكفيني
قالت «إسراء» في بداية حديثها : «أنا اتجوزت من 2015، خلفت من جوزي ولد وبنت، كان جواز صالونات، من ساعة ما اتجوزنا وانا عارفة أن جوزي مقتدر ومعاه فلوس وشغله بيدخل فلوس كويسة وأنه قادر يفتح بيت».
حكايات محكمة الأسرة.. مبيصرفش علينا مع ان معاه فلوس
تابعت «إسراء» حديثها قائلة: «المشاكل مع جوزي كان سببها إنه مبيصرفش مع أنه معاه يكفينا وزيادة، بس كان بيسمع كلام أهله إنه ميصرفش علينا كانوا بيتدخلوا في كل حاجة، مكنتش فاهمة هما بيعملوا كدة ليه في الأول بس بعد كدة عرفت أنهم بيضحكوا عليه وبياخدوا فلوسه».
دعاوي محكمة الأسرة.. أهل جوزي بيضحكوا عليه وياخدوا فلوسه
أضافت الزوجة: « كل مادى كان مبيصرفش، هو وأهله تجار مع بعض ومفهمينه أنهم بيشيلوا فلوسه معاهم ومش بيدوه ولا جنيه دول بيضحكوا عليه وسايبنا من غير فلوس نقدر نعيش بيها حتى ، وبيتشطر عليا أنا ويبهدلني لو طلبت المصاريف».
قضايا محكمة الأسرة.. أنا وعيالي مش لاقيين الأكل وأهله عايشين بفلوسه
أنهت «إسراء» حديثها قائلة: «لحد ما تعبت منه وقررت اسيبه ومرجعلوش تاني بسبب عمايله دي بقيت خلاص مش لاقية أصرف على ولادي ولا أكلهم وأهله عايشين بفلوسه واحنا مش لاقيين، ومن ساعة ما سيبته مصرفش علينا جنيه، بقالي خمس سنين مش عارفة اخد منه النفقة، بيتاخر في الدفع على طول أو مبيدفعش خالص وهو معاه فلوس ومش محتاج، مش لاقيه أكل أنا وولادي وهو كل شوية ميدفعش ولسه بيسمع كلام لأهله وميدفعش حاجة وهما عايشين بفلوسه».
تابع أحدث الأخبار عبر
