أخبار محكمة الأسرة
محكمة الأسرة .. ياسمين: حماتي جابتني من شعري في الصباحية وجوزي اتجوز على عفشي
كانت «ياسمين» في محكمة الأسرة وهي تحمل الحسرة على ما مرت به في زواجها بسبب حماتها التي لم تحترمها أو تقدرها يوما أو بسبب زوجها الذي لم يصونها أو يرعاها كما وعدها هي وأهلها ولم تكمل «ياسمين» السنة في بيت زوجها حتى تركته وبعد محاولات عديدة منها حتى تحافظ على بيتها من الخراب وكي لا يحدث الطلاق وهي مازالت عروسة جديدة، بائت كل محاولتها بالفشل واضطرت أن تتوجه لمحكمة الأسرة حتى تحصل على حقوقها التي منعها زوجها وأهله عنها.
قصص محكمة الأسرة.. اتجوزت في بيت عايلة عشان التقاليد
قالت «ياسمين» في بداية حديثها: «أنا اتجوزت من سنتين وسايبه جوزي من سنة ونص مكملتش سنة معاه في بيتي، اتقدملي وكان قريبي من بعيد كان كويس ومفيش منه مشاكل واتجوزنا في بيت عايلة عشان دي تقاليد البلد عندنا وقلت مادام هعاملهم كويس يبقى مش هيحصل مشاكل بس كنت غلطانة».
دعاوي محكمة الأسرة.. في مشاكل مع أهل جوزي من ساعة ما اتجوزت
أكملت الزوجة حديثها: «من أول الجواز وأنا عايشة في مشاكل بسبب أهل جوزي وحماتي، حماتي جابتي من شعري الصباحية عشان أنزل اشتغل في البيت واخدمها ربنا يعلم اني كنت بعاملها زي أمي ومكنتش بكرهها لكن هي كانت بتكرهني ومش بتعاملني كويس».
قضايا محكمة الأسرة.. متبهدلة من وأنا عروسة جديدة
تابعت «ياسمين»: «أهل جوزي كانوا بيعملوا مشاكل مع بعض ويدخلوني فيها وأنا مليش دعوة كنت كتير بحاول اني اعدي الدنيا ومخربش بيتي بس أنا كنت متبهدلة من ساعة ما كنت عروسة جديدة، وكنت كل ما اشتكي من بهدلة جوزي وأهلي ليا محدش كان بيقف معايا كنت بتحمل عشان خاطر جوزي كان كويس الأول وبعد الجواز اتغير مقدرتش اتحمل بعد كدة».
حكايات محكمة الأسرة.. اتجوز على عفشي
أنهت «ياسمين» حديثها وقالت: «المشاكل كل مادى كانت بتزيد لحد ما بقيت مش قادرة اتحمل مشيت وسيبت البيت ومن ساعتها مرجعتش تاني، وجوزي اتجوز على عفشي وأمه قالتله ميرجعنيش تاني، بعد ما كنت عايشة معاها وبخدمها مدافعتش عني وخدت حاجتي، وجيت عشان أرفع قضية خلع وقضية بالقايمة عشان أعرف أخد حقي ».
تابع أحدث الأخبار عبر
