أخبار محكمة الأسرة
قصص محكمة الأسرة.. داليا: خاربها مع كل جاراتي وبيسيبلهم المفتاح ياخدوا حاجتي
كانت «داليا» على أبواب محكمة الأسرة وهي تحمل الحزن والقهر على ما واجهته في حياتها مع زوجها؛ الذي كانت الخيانة في طبعه منذ زواجها منه ولم يقدرها أو يحترمها أبدا، خان الزوج زوجته لسنين عديدة مع جاراتها واستغل غياب زوجته وسمح لهن أن يدخلوا بيتها ويسرقوه، وتوجهت الزوجة لمحكمة الأسرة حتى تستطيع أن تحصل على حقوقها التي سرقها منها زوجها وحرمها منها.
قصص محكمة الأسرة.. مكنتش أتوقع اللي حصلنا ده
قالت «داليا» في بداية حديثها: «أنا اتجوزت من 2012 كان جواز تقليدي معايا من جوزي 3 بنات وسايباه من 3 سنين، الحياة في الأول كانت طبيعية ومفيش مشاكل، كان بيشتغل ويصرف عليا انا والعيال وانا قاعدة في البيت، حياتنا كانت عادية وطبيعية مكنتش أتوقع إن دي كانت هتبقى نهايتنا في الأخر».
دعاوي محكمة الأسرة.. جوزي بتاع ستات من زمان
أكملت الزوجة حديثها: «جوزي طلع بتاع ستات من زمان وانا اكتشفت متأخر، وعرفت لما كنت بلاقي حاجات في البيت ناقصة، لما واجهته اعترف وقالي ان الحجات المختفية ستات اللي واخداها، سيبت البيت كذا مرة بسبب الموضوع ده كل مرة اواجهه يرجع ندمان ويقول مش هيعمل كدة تاني وارجع عشان خاطر مخربش بيتي وبناتي ميتبهدلوش».
قضايا محكمة الأسرة.. حاجات بتتسرق من الشقة
تابعت «داليا»: «اكتشفت انه مقضيها مع جارتي اللي قدامي وجارتي اللي تحتي يجيبهم الشقة يستغل فرصة أنى مش في البيت وييدخلهم البيت يسرقوا حاجتي، اليومين اللي بكون فيها عند والدتي بيجيب الستات البيت كانوا بياخدوا عفشي ولبسي وكل حاجة، طلع كان سايبلهم المفتاح يدخلوا ويخرجوا براحتهم وانا معرفش، لكن لما عرفت قررت أسيبه ومرجعلوش تاني أبدا».
حكايات محكمة الأسرة.. عايش حياته وميبيسألش في أنا وبناته
أنهت «داليا» حديثها وقالت: «بعدما سيبته رفع قضية طاعة وانا عملت اعتراض بالطاعة وخدت طلاق بالشقاق واتحكملي بالطلاق، بسمع انه اتجوز انا معرفش حاجة عنه وهو مبيسألش علينا من ساعة ما سيبناه، ورفعت عليه قضية نفقة عشان أخد منه حقي هو خلاص عاش حياته ونسينا».
تابع أحدث الأخبار عبر
