أخبار محكمة الأسرة
محكمة الأسرة.. أسماء: استغل غيابي واتجوز عليا عرفي وبيضربني عشانها
تواجدت «أسماء» في محكمة الأسرة بسبب خيانة زوجها لها واستغلال حدوث خلاف بينهم وتزوج بسيدة أخرى بدون علمها، وبالرغم من صبر الزوجة على أن يكون لزوجها زوجة ثانية، لكن ما وجدته من زوجها هو القسوة والبخل عليها وعلى أبنائها من أجل زوجته الثانية واستمر في ظلمه اتجاهها حتى طردها من بيتها وأوصلها لمحكمة الأسرة.
قصص محكمة الأسرة
قالت «أسماء»: «أنا اتجوزت من 5 سنين خلفت من جوزي ولد وبنت، في أول الجواز مكنش في مشاكل بيني وبين جوزي لكن حصل بينا مشكلة كبيرة في مرة وقتها سيبت البيت ورحت عند أهلي، مكنش في أمل خالص أننا نرجع لبعض، وقتها هو عملي انذار بالطاعة وأنا رفعت عليه قضية خلع، بس اتنازلت عن القضية عشان هو صالحني وقالي نرجع عشان خاطر العيال اتصالحنا وروحت معاه.»
حكايات محكمة الأسرة
تابعت «أسماء»: «بعد ما رجعتله المشاكل زادت بقى يسهر برة البيت وهو دي مش عادته، لحد ما واحدة كلمتني في التليفون قالتلي انها مراته، قالتلي أسمي وعنواني وأسامي عيالي لما واجهته أنكر، وقتها أمي قالتلي خلاص متصدقيش، كبرت دماغي بس هو زاد في عمايله وبقى يتاخر أكتر ومبيعدش في البيت خالص.»
دعاوي محكمة الأسرة
أكملت «أسماء» حديثها: «لحد ما كلمتني تاني وقالتلي انها حامل منه لما واجهته المرة دي مأنكرش، طلع اتجوزها عرفي وانا غضبانة، طلبت الطلاق لأني مغلطش معاه أبدًا وشايلاه وبربي عياله، قال مش هقدر أسيبها عشان حامل قلت خلاص سيبني، قالي عايزة تطلقي اتنازلي عن كل حاجة حتى العيال، رفضت اسيب عيالي وكملت ورضيت بالوضع ده».
قضايا محكمة الأسرة
أنهت الزوجة حديثها والدموع في عينيها: «لحد ما أهملني خالص وبقى مبيعدش معايا خالص أنا والعيال ولا بيصرف علينا، لحد في يوم ضربني ومشاني بعد ما سلطته عليا أنه يضربني ويمشيني زي ما كانت بتهددني في التليفون أنه هيسبني، ساعتها كنت بقوله مفيش أكل في البيت قالي مش معايا فلوس وإذا كان عاجبك قلتله مانت بتصرف عليها ضربني وقالي متجبيش سيرتها، خدت العيال ومشيت، قلت هروح المحكمة عشان أعرف أخد حقي ورفعت خلع ونفقة.»
تابع أحدث الأخبار عبر
