أخبار محكمة الأسرة
محكمة الأسرة...عايدة: فلوسه كلها للمخدرات و بيضربني
كانت محكمة الأسرة هي نهاية قصتها مع زوجها الذي ترك المخدرات تدمر حياته وأسرته، تحملت «عايدة» مع زوجها الذي لم ترى منه سوى الإهانة والظلم طوال حياتها، وبعد توقف زوجها في تحمل مسؤولية أسرته وأصبح عقله وأمواله متوجهين تجاه المخدرات فقط، قررت الزوجة أن تنفصل عن زوجها وتتركه وتحاول أن تحصل على حقوقها من المحكمة حتى تحافظ على مستقبل بناتها.
قصص محكمة الأسرة
قالت «عايدة» عن حياتها مع زوجها الذي دمر حياتها: «أنا اتجوزت من 15 سنة كان جواز تقليدي، معايا من جوزي بنتين وسايباه من 8 شهورمتطلقناش من ساعة ما سيبته، طول حياتي معاه بهدلة ومن ساعة ما سيبته مش راضي يريحني ويطلقني، في أول الجواز خالص كان عادي زي الناس ومفيش منه مشاكل، لكن كل حاجة اتغيرت بعدين.»
حكايات محكمة الأسرة
تابعت «عايدة» حديثها: «كل حياتنا اتغيرت لما بقى بيشرب مخدرات، بقى مبيصرفش على البيت وفلوسه كلها للمخدرات، وكل ما أطلب منه فلوس للبيت ملاقيش غير الضرب والإهانة، دي كانت مشكلتي الأساسية معاه الحياة معاه كلها كانت ضرب واهانة من زمان كان بيضرب ضرب غبي مبيشوفش قدامه، ايده زي المرزبة مكنش بيحتاج يضربني حاجة ايده كفاية، كان بيبقى هيموتني.»
دعاوي محكمة الأسرة
أكملت «عايدة» حديثها وقالت: «كان بيضربني ضرب اروح المستشفى بسببه، من ساعة الجواز وهو بيضربني ومبيتعدلش أبدا مفيش حل معاه، سيبت البيت كتير ورجعت عشان البنتين ميتبهدلوش وكل مرة يوعدني ويقولي هيتعدل لكن مفيش فايدة فيه مبيتغيرش، لحد ما زهقت منه ومقدرتش خلاص ولقيته بيزيد في طبعه مبيقلش قررت ساعتها اسيبه ومرجعلوش تاني.»
قضايا محكمة الأسرة
أنهت «عايدة» الزوجة المظلومة حديثها وقالت: «من ساعة ما سيبته مسألش فيا أنا والبنات ولا حاول يرجعنا ما صدق يعيش لنفسه وميبقاش فيه مسؤولية على قفاه، طلبت منه الطلاق بس هو مش في وعيه حتى أن هو يطلق رفض وقالي هيتغير بس أنا خلاص مبقتش اصدقه، وجيت المحكمة ورفعت عليه قصية خلع ولما عرف جه ضربني في بيت أهلي، ورفعت عليه قضية نفقة عشان خاطر حق بناتي اللي مبيسألش فيهم.»
تابع أحدث الأخبار عبر
