أخبار محكمة الأسرة
محكمة الأسرة.. حنان تطلب الخلع: مدمن حريم وأخرتها خاني مع صاحبة عمري
تواجدت «حنان» أمام محكمة الأسرة والعيون في عينيها بسبب المعاناة التي عاشتها مع زوجها الذي خانها ودمر ثقتها في نفسها والناس حولها، بسبب خيانته المتكررة لها مع سيدات عديدة، حتى وصلت خيانته لصديقتها وجارتها، وبالرغم من محاولات الزوجة أن تحافظ على بيتها، كانت علاقات زوجها ونزواته كفاية لتخرب بيت «حنان» وتوصلها لمحكمة الأسرة.
قصص محكمة الأسرة
قالت «حنان» عن بداية علاقتها بزوجها: «أنا وجوزي اتجوزنا من 8 سنين خلفت منه ولد وبنت، كان جواز تقليدي وحياتنا كانت عادية ومفيش مشاكل؛ في الأول كان بيصرف ومحترم وحياتنا زي اتنين متجوزين، كان على طول طريقته مع الستات غريبة وبيتكلم معاهم كتير ولما اتضايق يقولي مفيش حاجة ومتكبريش الموضوع وكنت بكبر دماغي عشان معملش مشاكل».
حكايات محكمة الأسرة
تابعت «حنان» كلامها عن معانتها مع زوجها وقالت: «كان بيكلم ستات كتير وكنت بعرف من تليفونه وبشوفه وهو بيخرج معاهم وحاولت معاه كتير إنه يبطل اللي بيعمله ده، وكل مرة هيقولي هيتعدل لكن مفيش فايدة وبيرجع تاني، لحد ما بقيت أعدي عشان خاطر مخربش بيتي ومبهدلش عيالي، لحد في أخر مرة لقيته بيكلم واحدة صاحبتي وجارتي، زعلت وقتها جدا ومعرفتش اعمل ايه، حصل اكتر من موقف صعب منه وكلامه معاها كان وحش جدا وقلتله كذا مرة ميتكررش تاني وميكلمهاش ووعدني انه هيعمل كدة.»
عجائب محكمة الاسرة
أكملت «حنان» كلامها: «فضلت فترة ادور في تليفونه عشان اعرف بيكلمها ولا لأ، ولما دورت ملقتش حاجة وقلت خلاص سابها، لكن اكتشفت إنه بيمسح رسايلهم وكلامهم سوا، لما لقيت رسالة وعرفت إنه لسه بيكلم صحبتي وجارتي، لما واجهته أنكر وقررت ساعتها اسيبه ومرضيتش ارجعله تاني.»
قضايا محكمة الأسرة
أنهت «حنان» حديثها وقالت: «من بعد ما سيبته وهو مسألش في أنا والعيال، رمانا من غير مصاريف أو أي حاجة، ورفض يحل من غير مشاكل ويطلقني ودي عشان كان عايز ياكل حقي، فلجأت للمحاكم ورفعت عليه قضية نفقة عشان حقي اللي مش راضي يدهوني، ورفعت قضية خلع لأني خلاص مش عايزياه ولا عايزه أكمل معاه، من بعد الطلاق وأهله مبهدلني وموقفوش معايا وهو عايش حياته واتجوز واحدة تانية بعد ما سيبته بـ 8 شهور مكنتش اعرفها غير جارتي اللي كان بيخوني معاها.»
تابع أحدث الأخبار عبر
