أخبار محكمة الأسرة
محكمة الأسرة.. منى: مدمن مخدرات وأخته سرقت شقتي وباعت العفش
كان سبب تواجد «منى» في محكمة الأسرة هو إدمان زوجها للمخدرات وبعد محاولات عديدة في علاج زوجها وجدت الزوجة نفسها تحارب في معركة المخدرات وحدها ولم تجد أحد يساندها أو يدعمها وتوجهت في النهاية لمحكمة الأسرة حتى تحصل على حقوقها من زوجها وأهله الذي دمروا أسرتها.
قصص محكمة الأسرة
قالت «منى»: «أنا اتجوزت من 12 سنة وخلفت من جوزي ولد وبنت، كان في الأول طبيعي ومفيش منه مشاكل كنا زي أي زوجين عادي كان بيحب عياله وبيعاملهم كويس ومكنش بيستخسر فيهم حاجة ولا فيا، لحد ما اتعرف على ناس مش كويسة خلوه يمشي في سكة المخدرات»
حكايات محكمة الأسرة
تابعت «منى»: «المخدرات قلبت حاله خلته واحد تاني، بقينا على طول في مشاكل كانت بسبب إنه بقى مبيصرفش وفلوسه رايحة على المخدرات، وبيعاملني أنا والعيال وحش وبيضربنا بعد مكنش بيمد ايده علينا، كنت عايشة عشان خاطر العيال ميتبهدلوش لكن زهقت منه ومن الحياة معاه، ولقيت مفيش فايدة معاه ولا في علاجه.»
دعاوي محكمة الأسرة
أضافت «منى» وقالت عن زوجها الذي اختار المخدرات وترك عائلته تتدمر: «حاولت معاه كتير إنه يتعالج لكن مفيش فايدة، ومحدش وقف معايا أهله بيكذبوني وبيقولوا انتي بتكدبي وبتفتري عليه وهو مش مدمن ولا حاجة، اقتنعوا لما دخل المصحة عشان يتعالج، مدخلش غير بعد ما سيبته وفات الأوان وبعد ما خرج رجع للمخدرات تاني».
قضايا محكمة الأسرة
أنهت «منى» حديثها وقالت: «طلقني ودي بعد مبقاش في وعيه أصلا، معرفش عنه حاجة من ساعة الطلاق، ورفعت عليه قضية تمكين وكسبتها، لما جاله إعلان قضية التمكين غير كالون الشقة استلمت الشقة فاضية، وعرفت إن أخته هي اللي فضت الشقة استغلت إن عندي حالة وفاة ومسافرة سرقت الشقة وخدت كل عفشي، رفعت عليه قضية نفقة عشان أخد حقي أنا وولادي اللي مبيسألش فيهم، بيدفع بعد ما كسبت التمكين لما عرف إني هكسب النفقة بقى يدفع ودي بس قليل، كنت بخليه يشوف العيال بس لما لقيت حالته تدهورت كده رفضت أخليه يشوفهم تاني عشان خايفة عليهم يطلعوا زيه أو يأذيهم».
تابع أحدث الأخبار عبر
