أخبار محكمة الأسرة
محكمة الأسرة.. حسناء: سافر يشتغل رجع عنده مرض خبيث بسبب نزواته
كانت محكمة الأسرة هي المكان الذي تواجدت فيه «حسناء» بعد 15 سنة زواج، وكان سبب تواجدها هو زوجها الذي خدعها طوال هذه السنين وأقنعها أنه سافر خارج مصر حتى يوفر لها ولأولادهم حياة مستقرة، ولسنين صدقت الزوجة زوجها وظنت إن ربنا عوضها برجل محترم يصونها ويصون أولادها، حتى اصطدمت الزوجة بعد عودة زوجها من السفر أن الصورة التي رسمتها لزوجها كانت عكس الحقيقة تماما.
قصص محكمة الأسرة
قالت «حسناء» عن حياتها الزوجية: «أنا اتجوزت من 15 سنة كان جواز تقليدي، خلفت من جوزي ولد وبنت، أول الجواز الدنيا كانت مش مستقرة كنا زي اتنين بادئين حياتهم، ومع الخلفة المصاريف زادت ومبقيناش قادرين عليها، لحد ما هو جاله فرصة شغل بره مصر ساعتها وافق عليها لأنها كانت فرصة كويسة جدًا وهتحل كل مشاكلنا المادية».
حكايات محكمة الأسرة
أكملت «حسناء» حديثها وقالت: «بعد ما سافر الحياة كانت طبيعية ومفيش مشاكل كان بيبعتلي فلوس وأنا اللي شايلة مسؤولية البيت والعيال، كان بينزل إجازة كل فترة ومكنش في مشاكل الدنيا كانت عادية، ربنا كرمنا والمشاكل المادية اتحلت ومستوانا المادي بقى كويس، وأنا كنت بحوش لحد ما جيبت شقة في مكان أحسن من اللي كنا فيه، كنت فاكرة إن خلاص مش هيبقى في مشاكل تاني بس كنت غلطانة».
دعاوي محكمة الأسرة
تابعت الزوجة: «لما رجع أخر مرة رجع تعبان وراح للدكتور مع واحد صاحبه، وصاحبه حكى لمراته إن المرض اللي عند جوزي سببه حاجة مش كويسة، والمرض جه لجوزي لإنه اتعدى من واحدة بسبب علاقاته الكتير، مرات صاحبه قالتلي وكنت وقتها مش عارفة أعمل ايه، هو طول عمره شخص كويس ومثالي ومفيش منه مشاكل».
قضايا محكمة الأسرة
أنهت الزوجة حديثها: «لما الموضوع اتعرف كانت فضيحة طبعًا وأنا مقدرتش أكمل معاه لأني أصلًا خفت على نفسي أن ممكن اتعدي أنا كمان بسببه وبسبب علاقاته، رفعت عليه قضية خلع وبعد كدة رفعت قضية نفقة عشان حقي أنا وولادي، لما عرف إني رفعت عليه قضية وإنه خلاص اتفضح طردني من شقتنا وخد حاجتي كلها».
تابع أحدث الأخبار عبر
