نهى في محكمة الأسرة: بقالي 5 سنين معرفش عنه حاجة واخرتها عايز ياكل حقي
كانت قصة زواج «نهى» مختلفة عن العديد من البنات التي تزوجت دخلت عش الزوجية وعاشت حياة طبيعية مع زوجها الذي اختارته أن تكمل معه حياتها، كانت قصتها ونهايتها مختلفة.
تزوجت «نهى» زواج تقليدي وظنت أن الحياة بعد الزواج ستكون وردية، لكنها عاشت سنة واحدة فقط مع زوجها في بيتها حتى انتهت حياتها الزوجية من قبل أن تبدأ، لمدة 5 سنوات سافر الزوج ولم تعرف الزوجة طريق له أو أخباره وعاشت طوال هذه السنين على أمل أن يعود زوجها وتعيش معه في بيتهم حياة طبيعية، لكن لم تتحقق أي من أحلامها ولسنين أصبحت محاكم الأسرة المكان الذي تلجأ إليه حتى تحصل على حقوقها الذي حرمها زوجها منها.
زواج تقليدي
قالت نهى: «أنا اتجوزت من 6 سنين كان جواز تقليدي اتعرفنا على بعض وكان شخص كويس ومفيش مشاكل، وافقت عليه واتخطبنا وبعد الخطوبة القصيرة اتجوزنا، عشنا مع بعض سنة ومكنش في مشاكل، كان بني أدم عادي والدنيا ماشية».
سافر خمس سنين واختفى
أكملت نهى متأثرة: «بعد ما عيشنا مع بعض سنة واحدة بس سافر وكان المفروض مسافر فترة شغل وهيرجع تاني، لكنه سافر وفضل خمس سنين، مكنتش عارفة حتى هو سافر وراح فين، حاولت بكل الطرق إني أوصله أو أتكلم معاه عشان يرجع لكن معرفتش، اختفى ومعرفلوش طريق».
مش عايز يديني حقوقي
تابعت نهى: «لما لاقيت الوضع كدة وهو فقدت الأمل أن هو يرجع قلت اشوف حياتي أحسن، ورفعت دعوى تطليق، لما عرف انى هرفع القضية عمل إنذار بالطاعة المحامي بتاعي "محمود سيد حندول" اعترض على الدعوة والمحكمة رفضت إنذار الطاعة، عمل كدة عشان مش عايزني أخد حاجة من حقوقي»
بيكسر العفش عشان ملاقيش حاجة أخدها
أضافت نهى: «بعد ما كان بقاله خمس سنين معرفش عنه أي حاجة دلوقتي بقى موجود لما عرف اني عايزة أخد حقي، الشقة بتاعتنا مستعملهاش غير سنة بس، لما عرف اني رفعت القضية و هاخد العفش بدأ يبوظوا العفش ويكسره ورفعت دعوى تبديد منقولات زوجية، لسه بلف في المحاكم عشان أقدر أخد حقي منه، القضية لسه شغالة في المحاكم».
تابع أحدث الأخبار عبر
