هبة في دعوى نفقة: سلفتي مطلعة عيني وسبب خراب بيتي
عكس العديد من القضايا التي تتواجد في محكمة الأسرة كان سبب تواجد «هبة» ليس زوجها أو أهل زوجها لكن سلفتها التي لم تتوقع أبدا أن الخلافات معها ممكن أن توصلها لهذه النهاية.
تزوجت «هبة» وكانت سعيدة بدخولها القفص الزوجي وأن تبدأ حياتها الأسرية مع من اختارته أن يكون شريك حياتها وتنشئ معه أسرة ولكن لم تتوقعه أن تكون نهاية زواجها بسبب خلافات عائلية حاولت الزوجة أن تبتعد عنها لكن اضطرت أن تصطدم بها في النهاية، وكانت سبب تواجدها في محكمة الأسرة اليوم.
زواج صالونات وحلم دخول القفص الذهبي
قالت هبة: «أنا اتجوزت من 4 سنين خلفت من جوزي بنت واحدة بس، كان جواز صالونات، وافقت عليه بعد ما سألنا الناس وقالوا عليه راجل محترم وأهله ناس كويسة، كنت فرحانة أني هتجوز وابقى عروسة وعندي بيت وعيال.»
زواج في بيت عائلة
تابعت هبة: «اتجوزت في بيت عائلة وكنت عارفة مشاكل بيت العائلة بس قلت إني هتحمل و هعاملهم كويس واتقي ربنا فيهم ومش هيبقى في مشاكل لكني كنت غلطانة، من ساعة ما اتجوزت والمشاكل مع أهله مبتخلصش، حاولت كتير معاهم انهم يتعدلوا ونكون كويسين سوا لكن مفيش فايدة»
سلفتي مطلعة عيني
أضافت الزوجة: «أول المشاكل كانت مع سلفتي، من أول الجواز وأنا عروسة جديدة كانت بتنزل عيالها يقعدوا عندي وهي ساكنة فوقي، الأول كنت بتحملهم عادي لكنها كانت بتزودها وعلى طول تسيبهم عندي عشان عايزة تشتغل وتسيبلي العيال عشان صداعهم، حتى بالليل عايزة تنزلهم يقعدوا عندي وانا كنت لسه عروسة جديدة لما اشتكيت لأهل جوزي قالوا مرات الكبير منقدرش نتكلم»
أهل جوزي واخدين صف سلفتي
أكملت هبة: «عملت معايا مشاكل كتير وخناقات ومهما اشتكيت برضه كانوا بيطلعوني أنا اللي غلطانة وهي ميغلطوهاش أبدا، كل لما يحصل مشكلة يقولوا دي مرات الكبير مينفعش نزعلها حتى جوزي مكنش بيقف معايا وبيقف مع مرات أخوه»
دعوى نفقة
أنهت هبة حديثها: «بعد مشاكل كتير بقيت خلاص مش قادرة اتحمل حصلت مشكلة بيني وبين جوزي وأهله اتدخلوا طبعا و اخو جوزي الكبير ده اللي طردني من شقتي، ومن ساعتها مرجعتش تاني وجوزي مبيسألش فيا أنا وبنتي وجيت أرفع عليه قضية نفقة عشان مبيصرفش عليها ولا جنية.»
تابع أحدث الأخبار عبر
