«أمه ضرتي التانية».. منى في دعوى خلع: حماتي محرماه يقعد معايا أنا والعيال
حلمت منى بحياة هادئة بعد الزواج مع الشريك الذي اختاره قلبها ولكن حماتها كان لها رأي أخر وحرضت ابنها على الزواج من أخرى بعد ما افتعلت الكثير من المشكلات معها وإقناعه بأنها ليس الخيار الصحيح الأفضل له وأنه الزواج مرة أخرى، تزوج بالفعل ولكن كانت المشكلات مع حماتها التي كانت السبب في رفع دعوى خلع.
جابلي ضرة وسكت عشان متطلقش
ارتضت منى بالأمر الواقع حتى لا تطلب الطلاق ولكن كانت الأمور تتعقد بسبب تصرفات حماتها، استهلت الزوجة حديثها قائلة: "كانت حياتنا كويسة في أول الجواز بس من ساعة ما أمه حطتني في دماغها وحياتنا باظت، في الأول كانت بتقعد تقول له دي مستهلكش وانت تستاهل واحدة أحسن منها"، تابعت: "كنت بقول عادي أمه وغيرانة عليه عشان لسة متجوز بس بقت بتعمل مشاكل بينا كتير من غير أي سبب وطول الوقت خناقات ومشاكل بسببها، وبقت بتخترع أي حاجة عشان تتخانق معايا".
سايرت أمورها في البداية ولكن الأوضاع ساءت بعد ما حرضته على الزواج من أخرى، تمادت حماتها في أسلوبها السيء معها، تستكمل باقي تفاصيل قصتها قائلة: "كل شوية بقت تقول له لازم تتجوز واحدة تاني أحسن من اللي انت متجوزها دي، كنت فاكراه مش هيسمع كلامها بس لقيته اتجوز فعلا، ورغم كدا مطلبتش الطلاق خالص وقلت أعيش وخلاص عشان العيال".
أمه ضرتي التانية
تصاعدت المشكلات ليس مع ضرتها ولكن مع حماتها التي استمرت في افتعال المشكلات معها ما جعلها تفكر في الانفصال واخذ ابنها الصغير والفرار بعيدًا عن حماتها التي اعتبرتها ضرتها الثانية، أضافت منى: “سكت عشان مطلقش، بس أمه مكنتش سيباني في حالي بقا، وكانت هي ضرتي التانية، ومبقتش عارفة اتعامل معاها، وكل ما اجي أتكلم معاه في أي حاجة تيجي تاخده من جمبي، وكل ما تشوفه قاعد معايا ومع العيال تتعفرت وتيجي تاخده من وسط عياله”.
تنهي رواياتها قائلة: "تعبت من حماتي اللي مش مخلياني عارفة أتلم على جوزي شوية على بعض، مقدرتش استحمل العيشة اللي انا فيها دي وطلبت منه الطلاق كتير بس هو مبيرضاش، خدت العيال ومشيت ورفعت عليه قضية خلع عشان اخلص منه هو وأمه".
تابع أحدث الأخبار عبر
