خلود في دعوى طلاق ضرر: مضيع فلوسه على المخدرات
عندما واجهت «خلود» مشاكل مع زوجها مدمن المخدرات ولجأت لتحصل على المساعدة من أمها لم تجد المساعدة ولكنها وجدت أمها تطلب منها أن تتحمل الحياة مع زوجها الذي كانت الحياة معه مستحيلة.
تزوجت «خلود» ولم ترد سوى أن تعيش حياة طبيعية مع زوجها وتكون معه أسرة ولكن منذ زواجها كانت علاقتها مع زوجها متوترة بسبب عدم صرف زوجها عليها وعلى بناتها، وبعد فترة اكتشفت الزوجة ادمانه للمخدرات، وحاولت الزوجة أن تتركه أكثر من مرة بسبب طباعه الصعبة ولكن ظلت والدتها تمنعها من اتخاذ هذا القرار، حتى وصلت في النهاية لمحكمة الأسرة حتى تحصل على حريتها من زوجها عن طريق دعوى طلاق ضرر.
جوزي طلع مدمن مخدرات
قالت «خلود»: أنا متجوزة من 8 سنين معايا من جوزي 3 بنات وسايباه بقالي 3 سنين، لما خلفت أول بنت جوزي كان كويس و مفيش مشاكل من ساعة تاني بنت وهو بدأ في المشاكل والخناقات والبهدلة، واكتشفت في الأخر انه بيشرب مخدرات.
مضيع فلوسه على المخدرات
تابعت «خلود»: من ساعة ما عرفت انه بيشرب وبقى مدمن مخدرات كنت عايزة اسيبه بس أمي كانت بتقولي الرجالة كلها بتشرب مخدرات اتحملي جوزك، كان بيشرب قدامي أنا وبناتي، ولما أقوله مينفعش كدة يعمل معايا مشاكل وخناقات كتير، و بقى مبيصرفش علينا وكل قبضه رايح على الشرب.
بيضربني ومبهدلني
أضافت «خلود»: بقى يضربني وكل مرة يضربني اغضب واروح عند أمي أقول لامي تعبت منه ومش عايزة اكمل معاه تقولي معلش واستحملي جوزك، وترجعني ليه تاني، لحد أخر مرة ضربني فيها كان شارب خنقني قدام بناتي وكان هيموتني، قررت ساعتها اسيبه ومرجعلوش تاني.
مبيصرفش ولا بيسأل على بناته
أنهت «خلود» حديثها: لما كنت معاه كان بيصرف قليل وامي هي اللي كانت بتكمل وتقولي معلش اصبري عليه جوزك مينفعش تسيبيه، ومن ساعة ما سيبته بقالنا سنين عند والدتي مبيسألش فينا ولا بعتلنا جنية واحد، و رفعت عليه قضية طلاق ضرر وقضية نفقة عشان أخد حق بناتي اللي مبيسالش عليهم، لو أمي مكنتش منعتني كنت سيبته من زمان وخلصت منه من بدري.
تابع أحدث الأخبار عبر
