هيام في دعوى نفقة: لما الفلوس لعبت في ايده رمانا عشان مبقيناش من مستواه
مثل أي زوجة أصيلة تحملت «هيام» ظروف زوجها الصعبة عندما تزوجته على أمل أن ينصلح حاله في يوم من الأيام ويكرمه الله ويستطيعوا أن يربوا أولادهم ويعطوهم ما يحتاجوه في الدنيا ويبنوا مستقبل لهم سويا، ولم تتوقع أبدا الغدر الذي راته من زوجها.
" سابني أنا وولاده لما مبقيناش قد المقام" هذا ما قالته «هيام» في أول كلامها عن سبب الذي أوصلها لمحكمة الأسرة، فتركها زوجها دون سؤال عليها أو على أولادهم بعد تحملها لظروفه الصعبة طوال سنين زواجهم، وعاشت على أمل أن تتحسن ظروفه، وبعد أن أصبح لديه عمل وأموال ليصرف بها على بيته وعلى أولاده فعل عكس المتوقع تماما، تركهم وحدهم واضطر زوجته أن تبحث عن طريق محكمة الأسرة لتحصل على حقوقها منه.
مكنش معاه فلوس وكنت بصبر عليه
قالت «هيام» صاحبة دعوى النفقة: أنا متجوزة من 13 سنة خلفت 4 أولاد كان جواز عادي مش عن حب، جوزي من ساعة ما اتجوزته وظروفه صعبة، وكنت بصبر عليه وبمشي الدنيا باللي يجيبه، وكنا عايشين ومستورين على القد.
اتحملت ظروفه عشان ولادي
تابعت الزوجة: المشاكل على المصاريف كانت كتيرة بس وكانت بتكتر مع الوقت بسبب العيشة اللي غليت، كنت بحاول امشي الدنيا وأقول دي ظروفه وهيعمل ايه، وكنت بحاول على قد ما اقدر اكفي البيت والولاد، الحياة كانت صعبة بس كنت بستحمل عشان ولادي ميتبهدلوش.
لما ربنا فرجها عليه سابنا ومسألش فينا
أضافت «هيام»: لحد من فترة لقى شغل جديد وبقى معاه فلوس فرحت و حمدت ربنا وبعد ما بقى معاه فلوس وجاب عربية، ولما قلت خلاص الدنيا هتفك عليا وعلى ولادي، سابنا ومشي أنا وولادي ومسالش فينا ومعرفلوش طريق.
بيقولي ملكيش عندي غير المحاكم
أنهت الزوجة كلامها وقالت: لما اشتغل والفلوس لعبت في ايده عرف ناس مش كويسة وسابني أنا وولادي، ودلوقتي معرفش هو فين ولما ابعتله أي حد عشان يرجع ويصرف على بيته وولاده، يقولي بيني وبينك المحاكم ومش هديكي حاجة، فجيت أرفع عليه قضية نفقة عشان مش لاقيه اصرف على ولادي، سايبني ومطلقناش لسه.
تابع أحدث الأخبار عبر
