«لما بيشرب بيتهمني في شرفي».. رباب بدعوى نفقة: "مبيصرفش عليا أنا وبنته عشان خلعته"
سنة واحدة فقط عاشتها «رباب» مع زوجها «محمد» وتركته وابنتها عمرها شهور فقط على كتفها وبعد 3 سنوات محايلة من الزوج وتوسط الأهالي بينهم عادت رباب لزوجها حتى تربي ابنتها مع ابيها ويعيشوا حياة طبيعية في بيتهم مثل أي عائلة لتستمر مع زوجها 6 أشهر فقط قبل أن تلجأ لـ محكمة الأسرة لتجد حل للمشكلات التي سببها زوجها لها.
تزوجت «رباب» من زوجها زواج صالونات وتوسمت فيه الخير أن يكون زوج صالح وأب يراعي أولادهم في المستقبل، لكن بعد الزواج اكتشفت الجانب المظلم الأخر من زوجها فكانت المخدرات والخمور والعلاقات المحرمة بالسيدات هي حياته.
«رباب»: انفصلت عن جوزي 3 سنين رجعتله 6 شهور واتطلقت تاني
قالت «رباب»: اتجوزته سنة واحدة بس وخلفت منه بنت وبعدين اتطلقت منه، اكتشفت انه بيشرب مخدرات لكن اللي خلاني أطلق إني اكتشف أنه بعد 40 يوم جواز كان بيجيب ستات البيت لما انزل اروح ازور أمي المريضة وعرفت إني لما كنت برجع بلاقي لبس وحجات مش بتاعتي.
تابعت كلامها: «انفصلت عنه 3 سنين رجعتله 6 شهور واتطلقت تاني، بعد ما اتحايل عليا واعتذر لي كتير و أهلي قالولي تعيشي في بيت جوزك أحسن وبنتك تتربى بينكم ورجعت على أساس إن والدته عالجته ومبقاش يشرب مخدرات ولما رجعتله اكتشفت أنه بقى يشرب خمرة وبقى أوحش بكتير من الأول بقى يمد إيده عليا وشتيمة وإهانة كان يشرب الكاسين ميدراش بنفسه وباللي بيقوله ولما يفوق يقولي حقك عليا وانا غلطان وسامحيني».
رباب :"جوزي لما بيشرب بيتهمني في شرفي"
أضافت "رباب": «اللي خلاني اسيبه تاني مرة إنه بقى يتهمني في شرفي ويقولي انتي جبتي حد البيت وأنا مش موجود، كانت الساعة تيجي خمسة المغرب يشرب الازازة من هنا يتهيأله حجات بتحصل وطول ما هو في وعيه يعتذر لي ويقولي أنا عارف إنك متعمليش كده، غير الضرب المستمر خلاني في مرة مسكت السكينة وقلتله هموت نفسي لو مبعدتش عني، في تاني مره قررت أخلعه وسيبت كل حاجة وقلتله مش عايزة حاجة».
أنهت كلامها: «دلوقتي مبيصرفش عليا أنا وبنته عشان سيبته وخلعته ، لما سيبته أول مرة رفعت قضية نفقة عشان بنتي كان عندها شهور وكنت محتاجة أصرف عليها ومنكش بيدفع ولما رجعتله متنازلتش عن القضية عشان ماكنتش مأمنه وبعد ما سيبته تاني مرة رفعت قضية نفقة مجمدة لأنه طول السنين دي مكنش بيدفع نفقة دلوقتي رافعة دعوى حبس عايزه فلوسي».
تابع أحدث الأخبار عبر
