«عايز يتستت».. أروى في دعوى طلاق: حابب ينام في البيت وأنزل اشتغل بداله
خلاف العديد من السيدات في محكمة الأسرة لم تقبل «أروى» إهانة زوجها لها من أجل ألا تخرب بيتها، وعندما وجدت أن ليس هناك تفاهم بينهما، وبدأ يضربها عندما تحدث بينهم مشكلة، قررت اللجوء لمحكمة الأسرة حتى تنهي زواجها منه وتحصل على حريتها.
تزوجت «أروى» زواج تقليدي ومنذ زواجها كان من الواضح ان هذا الزواج كان غلطة من البداية فلم يكن هناك اي تفاهم بين الزوج و «أروى»، فكانت المشاكل بينهم كثيرة بسبب عدم صرف الزوج اموال على زوجته، ورغبته في أن تصرف الزوجة عليه، وكان يزيد على كل خلافاتهم تعدي الزوج على «أروى» بالضرب، وعندما زاد التعب النفسي والجسدي لدى «أروى» رفعت دعوى طلاق حتى تحصل على حريتها.
عايز ينام في البيت وأنا اشتغل
قالت «أروى»: اتجوزت في ٢٠١٥، عندي ولد عنده خمس سنين، وسايبه جوزي بقالي سنتين، لما اتجوزنا كان جواز تقليدي، واول الجواز الدنيا كانت عادية وبعد فترة المشاكل بدأت، المشاكل كانت على طول بسبب المصاريف وانه مبيصرفش عايز ينام في البيت وانا اللي اشتغل وده اللي حصل فعلا غصب عني.
كل مشكلة تحصل يمسكني يضربني
تابعت «أروى»: مكنش في بينا أي تفاهم، كنت كل ما أحاول اتكلم معاه على المصاريف يقولي مش معايا فلوس أصرف إصرفي إنتي، بقى في مشاكل كتير وفي الآخر وصلت للضرب والإهانة، أنا مش هقبل إن حد يمد إيده عليا ، أي مشكلة كانت ممكن تتحل بالكلام وهو مكنش بيعرف يتعامل بأسلوب محترم.
عايز مرات أخوه هي اللي تمسك مصروف البيت
أكملت الزوجة: لحد أخر مشكلة حصلت بينا اخوه اتدخل فيها، وجوزي قالي هيدي مرات اخوه هي اللي تمسك مصروف البيت وهي اصلا اصغر مني ازاي هي اللي تمشي بيتي وتديني مصروف، لقيت في عند ومشاكل كتير وانا مش بتاعت مشاكل فسيبته ورحت عند والدي.
أنهت «أروى» كلامها قائلة: معرفتش أثبت أنه كان بيضربني، فجيت محكمة الأسرة رفعت قضية نفقة وهو عشان يوقف النفقة رفع قضية طاعة، فالطلاق اتحول لطلاق شقاق، هو مبيصرفش على ابني خالص وانا كنت بشتغل بس دلوقتي اعدت، لأن مواعيد الشغل مش مناسبة إني أعرف أخد بالي من ابني، وهو دلوقتي رفع دعوى رؤية بس انا بخليه يشوف ابنه ودي من غير قضايا عادي.
تابع أحدث الأخبار عبر
