رجع لحب عمره.. ياسمين بدعوى طلاق : «مش عارفة أكمل معاه وهو قلبه مع واحدة تانية»
أرادت "ياسمين" أن تتزوج عن قصة حب مثل القصص التي تشاهدها في الأفلام، ولكنها تنازلت عن حلمها عندما رأت في "عمرو" رجل مثالي يصلح للزواج، تزوجت وعاشت معه أحلى أيام عمرها ولكن لم تستمر حياتها السعيدة سوى سنتين فقط بعدما اكتشفت أنه عاد لحب عمره، لم تتحمل أن تعيش مع رجل يتعامل معها بعقله فقط، وقلبه ملك امرأة أخرى.
عشت معاه أحلى سنتين في عمري
"اتجوزنا جواز صالونات عادي وهو كان كويس معايا في الخطوبة حتى في بعد الجواز كان بيعاملني بما يرضي الله، عشان كدا حبيته وحياتنا كانت كويسة ومفيهاش مشاكل كتير خالص"، هكذا بدأت ياسمين رواياتها مؤكدة على حياتها الهادئة التي تعيشها من بداية الزواج ولكن كل شيء تحول في غمضة عين بعدما اكتشفت عودته لحب عمره بعد سنتان من الزواج، تضيف لحديثها: "طول عمري كنت عايزة اتجوز حد بحبه، بس لما عمرو جه أتقدم لي وسألنا عليه قالوا لي دا كويس واتخطبي وجربي وفعلا لما اتخطبت حبيته واتجوزنا وكل حاجة كانت تمام بس في السنة التانية من الجواز بدأت أشعر إنه اتغير معايا".
كل يوم يتكلم بالساعات في التليفون
شعرت الزوجة بأنه يوجد شيء غامض يجب عليها معرفته بسبب معاملته التي تحولت بدون مقدمات، وبدأ شكها يتحول ليقين بعدما تكاثرت مكالماته الهاتفية في منتصف الليل، ما زالت تتابع رواياتها قائلة: "معاملته اتغيرت وكل ما أكلمه في حاجة يتعصب علي وألاقي واحد تاني خالص قدامي حسيت إن في حاجة بس كنت بقول أكيد مشاكل في الشغل أو أي حاجة مضيقاه بس مكالماته اللي في نص الليل دي خليتني اتأكد إن في حاجة".
رجع لحب عمره
أضافت: "قفشته مرة وهو بيتكلم وخدت منه التليفون عرفت إنه بيكلم اللي كان بيحبها قبل الجواز، حصلت مشكلة كبيرة وكنت مصممة على الطلاق بس قال لي أخر مرة ومش هكلمها تاني وصدقته ورجعت عادي بس يدوب شهر ورجع يكلمها تاني".
تستكمل رواياتها: "كل المشاكل اللي بينا بسبب إنه بيكلمها، ولما المشاكل كترت قال لي أنا هفضل أكلمها إذا كان عاجبك، مصدقتش اللي سمعته ومكنتش عارفة أعمل إيه بس مقدرتش أكمل معاه وهو قلبه مع واحدة تانية، وسبت البيت ومشيت"، توجهت لمحكمة الأسرة من أجل رفع دعوى طلاق بعد ما أدركت أن قلبه مع امرأة ولن يعود مرة أخرى.
تابع أحدث الأخبار عبر
