«متجوزة اللهو الخفي».. «يمنى» في دعوى خلع: اختفى سنة ورجعلي بضرة وأهله ولعولي في حاجتي
حياة زوجية متوترة منذ بدايتها بسبب تعاطي الزوج للمخدرات، محاولات عديدة من الزوجة التي لم تبلغ من العمر 21 عامًا، لكن فشلت «يمنى» في جميع المحاولات، وانتهي بهم المطاف في محكمة الأسرة لرفع دعوى خلع.
بدأت مشاكل الزوجية منذ أول شهر زواج، لم يستطيع الزوج إخفاء الحقيقة أكثر من شهر، واكتشفت زوجته أنه يتعاطى كل أنواع المخدرات، ولكن لم تكن هذه المشكلة الوحيدة.
بدأت «يمني» تروي قصتها: «من أول شهر جواز وهو بيضربني، واكتشفت أنه بيشرب كل أنواع المخدرات، ومأثره علي عقله مبيبقاش مركز ولا مدرك هو بيعمل أيه، فضلت شهرين مستحملة ضرب وإهانة، وكنت حامل ومفيش مصاريف وحتى إهانة من اهله مش هو بس».
طفش وسابني بعد شهرين جواز
لم تستطيع «يمنى» تحمل الإهانة والمذلة أكثر من شهرين، ثم أكملت: «بعد شهرين مبقتش قادرة استحمل العيشة في بيت اهله من كتر الذل والمشاكل، بسبب انهم كانوا عوزين يجوزوه بنت عمته»، ثم اضافت: «قفلنا شقتنا ونزلنا القاهرة ورجع هو لوحده تاني البلد، واختفي كام شهر معرفش عنه أي حاجة، ولا عارفة اوصله، وعرفت أن اهله ولعولي في حاجتي اللي في شقتي في البلد».
طلع متجوز عليا بنت عمته
في كل مرة كان يختفي فيها الزوج لمدة كبيرة كانت تنقطع كل اخباره، ولا يترك لزوجته الحامل أي مصاريف، لكن تلك المرة اكتشفت الزوجة أنه قام بالزواج عليها من ابنة عمته.
تابعت «يمنى»: «اكتشفت أنه اتجوز عليا بنت عمته بعد مسيبت البلد بـ 3 أيام، طبعا أهلي اتصلوا بيه واتخانقوا معاه واختفى بعدها، كام شهر ورجع وقال إنه طلقها وأنه كان متجوزها عشان يرضيهم وياخد فلوسها، رجعتله وفضل موجود فترة ورجع اختفي تاني وفضلنا علي الوضع ده لحد مخلفت أبني، ولما أبني تم الشهرين رجع اختفي تاني سنه كاملة».
دعوتي طلاق للضرر وخلع
انهت قصتها: «قررت بعد تفكير كتير أني لازم اتطلق خلاص، هو كده كده مش في حياتنا، فعلا رفعت قضية طلاق للضرر وفضلت القضية في المحاكم سنة ومفيش طلاق تم ولا أي حاجة، قررت بعدها ارفع خلع والحمد لله فاضلي جلسة واحدة ويتم الخلع».
تابع أحدث الأخبار عبر
