منى في دعوى نفقة: "اتجوزته محلتوش اللضا وفي الأخر عاوز يتجوز بشقايا"
جواز صالونات كحال كثير من الأزواج، "منى" فتاة من عائلة ميسورة الحال تقدم لها “محمود” لخطبتها ووافقت على الزواج منه على الرغم من أن مستواه المادي مختلف تمام عن مستواها ولكنها أصرت على إتمام الزواج لأنها توسمت في كل الخير والصلاح.
مكنش حيلته جنيه
خاب ظنها بعد 20 عام من المكافحة مع زوج لا يملك أي شيء وبعدما ساعدته وساندته طوال هذه السنوات كانت المفاجأة طردها هي وأولادها، بدأت منى تروي قصتها للحادثة قائلة: "اتقدم لي صالونات عادي وكان محلتوش أي حاجة واهلي موافقوش عليه خالص عشان مستواه المادي اللي مش موجود، بس أنا صممت عليه وشوفته كويس وبابا لما شافني مصممة كدا وافق وهو اللي ساعدنا كتير".
تابعت: "مكنش معاه فلوس يجيب شقة ولا اي حاجة بابا قال تعالوا اقعدوا معانا وفعلا روحنا قعدنا معاه وأنا كنت بدي دروس وبساعده في المصاريف، شوية وجاتله فرصة في السعودية كويسة، كانت المرتب كويس بس عشان كانت المصايف كتير هناك فكان مبيعرفش يحوش".
سافر يشتغل وأنا اديت دروس
ظلت الزوجة أول مساندة له واستمر في عملها من أجل جلب بأموال بجانب أموال زوجها، بدأت الأمور تتحسن ومستواه المادي أصبح أفضل من قبل بكثير، أضافت: "بقا يشتغل هناك واللي يعرف يبعته كل شهر بيبعته وأنا كمان كملت في الدروس عشان أساعده والحمد لله بقى الحال تمام جدًا، وواحدة واحدة جبنا شقة كبيرة وكل فترة نتفق على حاجة نجيبها في الشقة وأروح اجيبها وهو برا ميعرفش أنا حاجة ولا يعرف أنا بتعب ازاي".
استكملت منى: "الشقة خلاص كملت من كل حاجة، كل فترة كان بيجي يزورنا و يقعد فترة صغيرة ويرجع تاني، بس أخر مرة جه معاملته تغيرت معانا خالص أنا والعيال وعمال يتخانق بالذات مع العيال عمال على بطال من غير سبب وحصلت خناقة كبيرة وقعد يضربهم والجيران سلكت منه العيال بالعافية".
طفشني عشان يتجوز بشقايا
أنهت رواياتها: "مكنتش فاهمة إنه بيعمل كل دا عشان عايز يطفشني عشان عايز يتجوز في الشقة اللي انا جهزتها معاه بتعبي، بس لما الموضوع زاد وكان هيموت عيل من العيال قلت له أنا عايز اتطلق وتطلقنا، ومن ساعتها وهو مش راضي يصرف جنيه على العيال خالص".
توجهت الزوجة لمحكمة الأسرة بالجيزة ورفع دعوى نفقة على طليقها بسبب إصراره ورفضه الإنفاق على أولاده.
تابع أحدث الأخبار عبر
