شادية في دعوى نفقة: «بعد 20 سنة جواز ساب بيته وأولاده عشان صاحبه»
مهم أن يختار الشخص أصدقائه بعناية فهناك أصدقاء داعمين يغيروا الحياة للأفضل وهناك أصدقاء السوء الذي يدمروا حياة من يصادقهم ، ولكن في قضية «شادية» صديق زوجها دمر أسرتها وجعلها تلجأ لمحكمة الأسرة لتحصل على حقها هي وأولادها من زوجها ولازالت تتسأل عن سبب تدمير صديق زوجها لحياتها حتى الآن.
تزوجت «شادية» من زوجها «علي» وأنجبت منه 3أولاد كانت حياتهم طبيعية مشاكلهم مثل مشاكل أي أسرة وخلافاتهم مثل خلافات أي زوجين ولمده 20سنة عاشوا حياتهم في بيتهم و وربوا أولادهم في بيتهم وسط أبوين محبين لكن منذ 8 سنين دخل «عامر» حياتهم على أنه صديق الزوج ولم تشك الزوجة للحظة أن تدخلات صديق زوجها في حياتهم ستدمر أسرتها التي بنتها مع زوجها كل هذه السنين.
قالت «شادية»: “عشت مع جوزي 20 سنة في أول حياتنا كان في مشاكل مع أهله لكن بعد كدة بعدت عنهم والمشاكل انتهت ، وكانت الحياة العادية وهو راجل عادي زي بقية الرجالة ومشاكلنا عادية والحياة كانت ماشية لحد من 8 سنين اتعرف على واحد صاحبه وحكالي عليه ومجاش في بالي إنه هيقلب حياتنا بالشكل ده”.
جوزي بيحكي لصاحبه كل حاجة في حياتنا حتى أسرار أوضة نومنا
تابعت الزوجة: "جوزي كان بيدي ودنه لصاحبه كل حاجة بيقولها جوزي بينفذها ع طول، ومع الوقت صاحبه دخل البيت وبقى يعد كأنه بيته وبيتدخل في كل حاجة، لما لاحظت حاولت أنى اسيطر على الموضوع على قد ما أقدر لكن صاحبه ده قرب منه أكتر وجوزي كان بيسمع لكل حاجة صاحبه بيقولها، عرفت بالصدفة أن جوزي كان معاه تليفون بيسجل المكالمات ، وانا كنت بسمعها من وراه سمعتوا بيحكي لصاحبه كل حاجة في حياتنا حتى اسرار أوضة نومنا ، وفي مكالمة منهم سمعت صاحبه بيقوله سيب البيت لمراتك عشان تتربى وفعلا جوزي مشي اتحايلت عليه عشان يفضل لكنه سابني انا وعيالي سنة ونص.
تابعت «شادية» كلامها متأثرة وقالت: في السنة والنص دي عرفت إن صاحبه جابله عروسة عشان يتجوز وخلاه عمل قرض بحجة إنه عشان يتجوز لكنه أخد القرض كله ليه لحد ماحصل خلاف وجوزي متجوزش ورجعنا تأني لبعض شهر واحد بس قبل الطلاق رجعت عشان خاطر ولادي لو بنتي جالها عريس يلاقي أبوها جمبها وابني الصغير كان تعبان ومحتاج أبوه جمبه.
رجعت لجوزي شهر بس قبل ما أتعب منه وأطلب الطلاق
تحدثت «شادية» عن الشهر الذي عادت فيه لزوجها قبل أن يفيض بها الكيل “وتطلب الطلاق وقالت: في الشهر ده جوزي كان بني ادم تاني غير اللي عيشت معاه 20 سنه كان راجع بنمط تأني يقولي اشتغلي وزيي زيك في البيت تصرفي زي مانا بصرف وأنا طول عمري مكنتش بشتغل وبخلي بالي من ولادي خلاني بقيت أنزل من 6 الصبح لحد 10 بليل في الشغل ، وكان الضغط عليا جامد جسمي تعبني من الشغل الزيادة غير طبعا المشاكل اللي كان بيعملها معايا، لحد ما جبت أخري من العيشة معاه و طلبت الطلاق رغم إني طول عمري مكنتش عايزة أطلق عشان ولادي لكن بعد اللي عمله معايا خلاني مش قادرة أعيش معاه وفي الأخر طلقني غيابي بعد ما طلع عيني”.
قالت «شادية» عن وضعها الحالي: أنا دلوقتي رافعة دعوى نفقة عشان أقدر أصرف على ولادي لأنه مبيشوفش ولادي من بعد الطلاق خالص ولسه صاحبه ده مسيطر على دماغه ومغرقه في الديون ومش قادر يسددها وانا خلاص فقدت الأمل إني أقدر أساعده.
