صابرين: حماتي عاملالي مواعيد عشان أنام مع جوزي وبتاخدني رهينة جمبها
أقبلت صابرين على الزواج وكلها تفاؤل بحياة زوجية سعيدة مع شريك الحياة الذي اختاره قلبها ولكن دائمًا يتواجد سبب لإفساد كل الأحلام الوردية، وكانت هذه المرة حماتها والدة الزوج هي السبب التي أفسدت عليهما حياتهما في بداياتها، فالنوم بميعاد والوقوف والجلوس بالأمر والمكوث معها لساعات طويلة أمر لايمكن تخطيه، حتى صارت الحياة جحيما لايطاق ووصل صبر الزوجة للنهاية بعد تعدي حماتها عليها بالضرب.
"من أول أسبوع في الجواز وأمه بتقعدني معاه تحت في شقتها لحد 4 الفجر، ومبترضاش تخليني أطلع الشقة إلا لو هي اللي قالت لي اطلعي"، هذه أول كلمات في قصة صابرين التي بدأت بها للقاضي مؤكدة على المعاناة التي عاشتها من الأسبوع الأول في الزواج بسبب والدة الزوج التي تعتبرها جارية يجب عليها خدمتها وبتقعدي جمبها زي أسير الحرب بالساعات.
من أول أسبوع جواز وأنا خدامة
أضافت: "مكنتش عايزة اتجوز من الأول في بيت عيلة بس امي قالت لي متبوظيش الجوازة عشان السبب دا وهتتعودي وعادي الكلام بتاع الأمهات دا، اتجوزنا ومن اول أسبوع وأمه قالت لي تنزلي من الساعة 8 الصبح عشان تروقي معاي".
تابعت الزوجة: "معترضتش وقلت عادي دي زي أمي ومش هيجرى حاجة لما أساعدها ودي حاجة حلوة وكل الكلام دا، ومن تاني أسبوع وأنا بنزلها من صباحية ربنا عشان أساعدها، وربنا يعلم كنت بعاملها زي أمي بالظبط".
كان موضوع التنضيف مرهق على الزوجة ولكنها كانت تفعله من أجل إرضاء زوجها ولكن بدأت مشكلات تحدث كل يوم بسبب تلكيكات والدة الزوج، تابعت الزوجة: "كل يوم بنزل وأساعدها عادي بس من تاني شهر كدا وبدأت تقف لي على الواحدة ومش طايقة لي كلمة وكل ما أعمل حاجة متعجبهاش والحاجات اللي بعملها تقعد تقول لي إيه القرف اللي انتي عاملاه دا".
أمه ضربتني علقة بسبب طبق في الحوض
أكملت حديثها قائلة: "بدأت بقى الخناقات بيني وبينها بسبب إنها بتتلكك على كل حاجة وأخ حاجة، كانت قايلالي اغسلي المواعين وغسلتها وحد وسخ طبق وجت لقيت الطبق في الحوض قالت لي إيه دا أنا مش قايلالك اغسلي المواعين".
تابعت: "مسكتني ضربتني عشان الطبق اللي كان في الحوض وأنا مصدقتش نفسي أصلا إنها تعمل حاجة زي كدا، ومجاش في بالي ولما كلمت جوزي قال لي معلش وأنا مقدرتش بصراحة استحمل الإهانة دي، وطلبت من الطلاق بس هو رفض وقال لي مش هطلق، عشان كدا رفعت دعوى طلاق بقالي شهرين عشان أخلص منه ومن امه"، ولا تزال القضية منظورة في المحكمة حتى الآن.
تابع أحدث الأخبار عبر
