«مش عاوز خلفة البنات».. صابرين في دعوى طلاق: "اتجوز على عفشي اللي متهنتش بيه"
زواج تحول لجحيم في السنة الأولى بسبب الزوج الذي تحول لشخص آخر منذ معرفته إن زوجته أنجبت بنت وليس ولدًا كما هو يريد، ومن هنا حاوطت المشكلات عش الزوجية بسبب تحول الزوج بطريقة لا تتحملها الزوجة ما أدى لتركها المنزل عدة مرات ولكن الشيء الذي جعلها تلجأ لرفع دعوى طلاق هو زواجه من أخرى في بيت الزوجية.
اتحول أول لما عرف إني حامل في بنت
"كان عايز ولد عشان كدا أول لما خلفت البنت وهو اتحول معايا وبقى واحد تاني خالص على طول زعيق وبيضربني عشان بيسمع لأهله وإخوته وبيسخنوه عليا وبقى على طول مشاكل وخلافات من أول ما خلفت أروى بنتي"، بهذه العبارة بدأت صابرين تروي قصتها للقاضي وكلها أمل أن ينجدها القضاء من زوجها.
تابعت: "أول كام شهر في الجواز كان كويس معايا بس أول لما عرف إني حامل في بنت وهو اتغير وبقى على طول يتعصب على أي حاجة ويضربني وأهله كمان بقوا مش طايقيني وبيسخنوه عليا وأي خناقة بينا يتدخلوا".
أضافت صابرين: "سبت البيت كتير وفي كل مرة أهله بيرجعوني تاني، وبقول مش مشكلة بس لما الوضع زاد، سبت البيت ورحت عند أهلي وبقالي هناك سنتين ونص عند أهلي يجي يشوف البت كل فترة وخلاص".
مش راضي يطلقني وعايزني ابريه
كان لديها الزوجة الأمل في كل مرة بالرجوع واستكمال حياتهما كان الزوج يخرب عليها كل الآمال، وأخر ما حدث هو زواجه عليها في بيت الزوجية، هنا أدركت الزوجة استحالة العيش معه وإن هذه هي النهاية لقصتهما فطلبت منه الطلاق، ولكنه لا يريد إتمام الطلاق إلا بالإبراء، تابعت الزوجة: "راميني عند أهلي ومش سائل فيا أنا والبنت ولما بيجي يشوفها مبيدهاش أي فلوس خالص، وطلبت منه الطلاق خلال السنتين ونص بس هو مش راضي يطلق إلا لما ابريه من كل حاجة عشان مش عايز يديني أي حاجة من حاجاتي".
اتجوز على عفشي
أضافت: "فضلنا كدا طول ما أنا غضبانة وإنه مش عايز يطلق، وكنت صابرة عليه عشان نحل الموضوع ودي، بس عرفت من كام شهر إنه اتجوز في بيتي على عفشي الجديد اللي ملحقتش اتهنى بيه".
اختتمت صابرين قصتها بكل حرقة: "حسبي الله نعم الوكيل فيه ربنا يجيب لي حقي منه ومن اللي عمله فيا، رفعت قضية طلاق بقالي 5 شهور ولسة ماشية في الإجراءات وإن شاء الله هرجع كل حاجتي".
تابع أحدث الأخبار عبر
