أحمد لمحكمة الأسرة : «طليقتي بتعامل بنتي كأنها سبوبة بتجبلها فلوس»
«أحمد» زوج كان كل أمله في الحياة أن يعيش حياة مستقرة مع زوجته وابنته لكن تدخل وتحكم وجشع أهل زوجته منعه عن تحقيق حلمه ودمر أسرته ومنعه عن رؤية ابنته وانتهى به الأمر في محكمة الأسرة لمدة 4 سنين.
قال «أحمد» عن مشكلته: “اتجوزت من 8 سنين وكان جواز صالونات عادي وخلفت منها بنت ومن ساعة ما اتجوزنا وأهلها كانوا بيدخلوا في كل حاجة نأكل إيه ونشرب إيه ونعمل أيه ومنعملش إيه، وهما اللي قرروا أننا نطلق ، وأنا مكنتش عايز أطلق بس لما لاقيتها هي وأهلها مصممين قلتلهم أطلق ودي لكن هما رفضوا وصمموا على المحاكم عشان هدفهم بهدلة الراجل ، وبقالي خمس سنين متبهدل في المحاكم”.
أكمل كلامه: “دلوقتي بقالنا 4 سنين متطلقين، خططت لكل حاجة وكانت عارفة أنها لو رفعت طلاق أنا هرفع طلب طاعة ولو رفعت طلاق ضرر هتخسر لانها أصلا محصلهاش ضرر ، وانا معايا شهود على كدة، فاتطلقت بخلع ورفعت عليا كل حاجة نفقة ومسكن ودلوقتي رافعة قضية عشان القائمة”.
“بالرغم من كل مشاكل أحمد مع زوجته ، وأهلها حاول بكل الطرق أن يحل المشاكل بينهم وديا فهي أم ابنته وهو لم يريد أن يطلقها ويخرب بيتهم من البداية وكان صعب عليه أن ينسى سنين العشرة بينهم، لكنه اكتشف نوايا زوجته الحقيقية بعد الطلاق”.
أحمد للقاضي :الجواز بالنسبالها كان بيزنس
تابع «أحمد»: "الجواز بالنسبالها كان بيزنس بستفاد منه وتعمل منه فلوس أول ما اطلقت بعد شهور العده على طول أتجوزت وأحد تاني ، وخلفت منه واطلقت تأني دي تالت جوازه ليها كان في واحد قبلي بسنة، واللي اطلقت منه بعدي مبهدلاه في المحاكم برضوا ورافعة عليه نفس القواضي اللي رفعتها عليا".
أضاف: "مش عارف اشوف بنتي بقالي 4 سنين أهلها مانعين أني اشوفها لا ودي ولا بالمحاكم، البنت معاها على انها سبوبة بتجيبلها فلوس من النفقة زي ابنها اللي جابته من الزوج اللي بعدي، أنا في محكمة الأسرة النهاردة عشان هي رافعة قضية بالقائمة وقلتلهم يجيبوا القائمة وأنا اديها حاجتها لكنهم تاني رفضوا الحل الودي ولجأوا للمحاكم عشان ياخدو فلوس ، وقالوا هنبهدلك المحاكم، احنا في مشكلة القائمة بقالها 4 سنين وقف حال في كل حاجة هي مش عايزة حاجة غير الفلوس وتخلي القضايا قائمة و الموضوع مبيخلصش وانا عايز أعيش حياتي واحط كل ده ورايا.
تزوج أحمد من جديد وكانت معه زوجته في المحكمة تقدم له الدعم، لكنه مازال لايستطيع أن يعيش حياة طبيعية وينشئ أسرة وهو كل يوم أمام المحاكم بسبب زواجه الأول.
تابع أحدث الأخبار عبر
