عبير: طلع علي سمعة إن ماشية مع رجالة لما عرف إني هخلعه
حظيت "عبير" بتحقيق حلمها في الخلاص من زوجها من خلال رفع دعوى خلع كان الحكم لصالحها بعد سنوات طويلة من معاملة الزوج القاسية معها هي والأولاد، ما دفعها للجوء للقضاء بعد ما فاض بها الكيل، وكانت تظن أن كل مشكلاتها تنتهي بمجرد أن ترفع القضية، ولكنها لا تعرف أن هذه القضية تفتح عليها باب جحيم جديد بعد ما علم الزوج بقضية الخلع التي رفعتها عليه الزوجة.
معاملة قاسية وضرب بلا رحمة لسنوات طويلة وكانت تصبر الزوجة على نصيبها لعله يغير رأيه في التعامل معها هي والأولاد ولكن لا حياة لمن تنادي مضيفة أنه تدخل الأهل مرات عديدة لتهدئة الأمور ولكن كان الوضع يزداد سوءً في كل مرة وعد بها بصلاح الحال، أضافت: "من أول الجواز وهو قاسي في المعاملة علي أوي ومبيتكلمش غير بالضرب، حتى لما بدأت اخلف برضو بيعاملهم زي الزفت وكل ما أجي أقوله براحة على العيال يقول لي مفيش براحة".
كنت فكراه هيتغير بعد الجواز
استرجعت عبير معاملته معها أثناء فترة الخطوبة قائلة: "في الخطوبة معاملته معيا كلها زعيق وخناق كنت عايزة افسخ الخطوبة كتير بسبب معاملته دي بس كانت أمي بتقول لي هيتغير بعد الجواز وأنا صدقتها وكملت في الخطوبة عادي وكان دا أكبر قرار غلط أنا خدته في حياتي وبدفع تمنه أنا والعيال دلوقتي".
أضافت: "واتجوزنا وكانت الصدمة في أسلوبه اللي كله ضرب وشتيمة، من أول شهر وأنا عايشة في خناقات طول الوقت واسيب البيت ويرجعني على أساس إنه هيتغير بس مفيش حاجة بتتغير وبيزيد في ضربه ليا أنا والعيال".
دعوى خلع لجأت إليها عبير
أكملت عبير حديثها: "لما لقيت مفيش حاجة بتتغير قررت إني اتطلق ولما رحت قلت له إني عايزة اتطلق قال لي مش هطلق، خدت العيال وسبت البيت ورفعت دعوى خلع عشان أخلص من قرفه".
تابعت: "أول لما عرف إني رفعت قضية خلع اتجنن وبقا يجيلي الشغل يتخانق معايا ويعمل لي مشاكل، كنت فاكرة إني هخلص منه أول لا ارفع القضية بس لقيت المشاكل بينا بتزيد مش بتقل، وبقى مطلع علي إشاعة في المنطقة إني ماشية مع رجالة".
اختتمت عبير قصتها: "حسبي الله ونعم الوكيل ربنا يجيب لي حق منه وأخلص منه بقا عشان أعرف أربي ولادي في هدوء".
تابع أحدث الأخبار عبر
