فاطمة في دعوى طلاق: «بيسرق حلل المطبخ ويبيعها عشان يجيب مخدرات»
المخدرات لحست دماغ جوزي مصطلح منتشرة في أورقة محاكم الأسرة فهي سبب أساسي لخراب بيوت كثيرة بسبب التحول الذي يشهده المدمن في أفعاله وتصرفاته مع الآخرين فلا يرى أي شيء سوى كيفه ومزاجه ويفعل كل شيء غير متوقع من أجل شراء مزاجه ، كما فعل زوج فاطمة الذي لجأ لبيع كل أمتعة البيت منها أطقم الحلل من أجل الحصول على أموال.
أقدمت فاطمة على اللجوء للقضاء ورفع دعوى طلاق من أجل التخلص من حياتها التي تعتريها المخدرات بعدما عرف الزوج طريق الإدمان وتحولت حياتهما السعيدة لجحيم، تابعت: "قعد أول سنتين كويس معيا وكل حاجة تمام وبيعاملني أحسن معاملة، بس فجأة بقا يسهر كتير على القهوة وصحابه عرفوه على طريق المخدرات وهو اتبدل بقا واحد تاني".
أضافت: "اتغير معايا بقا واحد تاني غير في أول الجواز وبقا كل ما أكلمه يتعصب علي ويضربني، مرة حدفني بالكوباية ومرة بالطبق، ووشي كله بقا علامات بسبب تهوره وضربه الغبي ليا".
مشي ورا صحابه وبقا مدمن
بدأت المشادات تسيطر على عش الزوجية بسبب ضرب الزوج المبرح للزوجة ما دفعها تطلب الطلاق أكثر من مرة ، ولكن كان يتوسل لها بأنه يتغير ، ولكن يبقى الحال كما هو عليه، تابعت الزوجة: "غضبت كتير بسبب معاملته اللي اتحولت وضربه ليا وطلبت منه الطلاق بس في كل مرة كان بيقول لي أنا هتغير عشانك، وارجع على هذا الأساس بس كل ما أرجع بيزيد".
أضافت: "أخر مرة رجعت له كانت دي أخر فرصة ليه بالنسبالي، بس طبعًا مبقاش في فلوس في البيت بنصرف على العيال عشان مضيع كل فلوسه على القرف اللي بيشربه ، وكمان لقيت حاجات البيت بتختفي".
بيسرق حلل المطبخ ويبعها عشان يجيب مخدرات
أكملت الزوجة حديثها: "كنت بقعد أدور على الحاجات ملقهاش، بس في يوم كنت سهرانة وهو ميعرفش إني صاحية ولقيته بيتسحب وبيسرق الحلل اللي في المطبخ عشان يبيعها، ولما وقفته وقلت له مودي الحاجات دي فين قال لي ملكيش دعوة أنا أعمل اللي أنا عايزه وزقني وفتح باب الشقة ومشي ولا اكني بتكلم"
انهت حديثها: "لما لقيت مفيش فايدة فيه ومفيش حاجة بتتغير وكل يوم بيزيد عن اليوم اللي قبله، قلت أنا لازم اتطلق وأخلص من العيشة اللي أنا عايشاها دي، وخدت العيال ورحت عند أهلي ورفعت قضية طلاق على طول" ولا تزال القضية منظورة في المحكمة حتى الآن.
تابع أحدث الأخبار عبر
