دعاء في دعوى خلع: "كنت فاكرة الجواز جنة طلع نار"
«البنت ملهاش غير بيت جوزها».. تتردد هذه الكلمات على لسان الأهل من أجل إقناع بناتهم بالزواج وأنه الحلم الأسمى لكل بنت يجب عليها تحقيقه بأقصى سرعة، حتى وإن كان سنها لا يتناسب بأن تدرك ما هو الزوج؟ وما هي مسئولياته؟، لذلك تفشل قصص زواج كثيرة في الأشهر الأولى، وبالرغم من محاولاتهن في إصلاح الحياة الزوجية والصبر على القضاء إلا أن كل المحاولات تبوء بالفشل ما يدفع سيدات كثيرة لرفع دعوى خلع.
"اتجوزت وأنا صغيرة جدًا" بهذه العبارة بدأت دعاء حديثها تروي معاناتها مع زوجها مؤكدة أنها كانت تظن أن الزواج هو الحلم الأسمى لها وأن سيحل كل المشكلات ولكنها تفاجئت بعد أول شهر من الزواج أن حياتها تحولت لجحيم بدلًا من أن تتحول لسعادة غامرة كما كانت تظن، أضافت: "اتخطبت وأنا صغيرة أوي كان عندي 15 سنة عشان كل أصحابي كان بيتخطبوا وأنا لسة وأهلي قالوا لي إن البنت ملهاش غير بيت جوزها، وكنت فاكرة إن الجواز أحسن حاجة في الدنيا من كلامهم بس لما اتجوزت لقيت غير كدا خالص".
تابعت في دعوى خلع: "أتقدم لي جارنا شغال على سواق توك توك وأهلي شافوا إنه حد كويس وبيكسب ومحترم وأنا سمعت كلامهم وقلت هما أكيد أضرى بمصلحتي واتخطبنا 6 شهور بس واتجوزنا على طول".
صدمة الزوجة بالواقع
ظنت «دعاء» أن الدنيا تضحك لها بمجرد أن تتزوج ولكن الحقيقية كانت مرة على عكس ما توقعته، أضافت: “معرفتهوش كويس في الخطوبة عشان مقعدناش فترة خطوبة طويلة، كنت فاكراه زي ما أهلي بيقولوا عليه إنه محترم وكويس بس في الحقيقة اتصدمت من أسلوبه في أول شهر”.
تابعت: "في يوم كنا لسه في شهر العسل لقيته بيقولي انتي مش هتنزلي لأمي قلت له أنا لسة في شهر العسل قال لي وفيها إيه المفروض تخدميها من أول يوم جيتي فيه هنا ولقيته ضربني بالقلم وقعت على الأرض، نزلت عشان معملش مشاكل بس تاني يوم جه برضو وقالي تاني انزلي قلت له مش هنزل".
أكملت «دعاء» حديثها: "ضربني تاني سبت البيت وروحت عند أهلي وقولت لهم عايزة اتطلق قالوا لي انتي لسه في الأول وطبيعي بيحصل مشاكل واستحملي والكلام دا، روحت وقلت يمكن هما صح وعشان احنا بس في الأول بس لقيت الموضوع اتكرر وبقا يضربني على أي كلمة بقولها".
أصرت الزوجة على الانفصال رغم رفض أهلها
تركت «دعاء» المنزل عندما سئمت من معاملة زوجها لها بسبب إهانتها وضربها لها طوال الوقت وطلبت الطلاق ولكن الأهل رفضوا فكرة الطلاق لأنها في الأشهر الأولى من زواجها، مضيفة: "كل مرة لما بغضب عند أهلي واقولهم إني عايزة اتطلق يقولوا لي لا مينفعش انتي لسة في أول الجواز وهتتعودي عليه، فضلت كدا طول 5 سنين ومفيش حاجة بتتغير، وهو زي ما هو مبيعملش حاجة غير إنه بيضربني".
تابعت: “في يوم اتخانقنا وضربني كالعادة بس قررت في اليوم دا إني خلاص هتطلق حتى لو أهلي مش موافقين، وروحت عند أهلي بقالي شهرين وفي نفس اليوم كنت في المحكمة رفعت قضية خلع عليه”.
أنهت «دعاء» حديثها: “أنا بنصح البنات ميعملوش زيي وميتجوزش وهما صغيرين، الواحدة لازم تخلص تعليمها الأول وبعدين تبقى تفكر في الجواز عشان تبقى كبيرة وناضجة وتعرف تختار صح من غير ما أهلها يضغطوا عليها".
تابع أحدث الأخبار عبر
