كريمة: اخوات جوزي قالوا عليا إني متجوزة عرفي عشان ميدونيش الورث
لجأت السيدة كريمة لمحكمة الأسرة ورفع دعوى إعلام وراثة لأخذ حقها وحق أولادها بعد وفاة زوجها بسبب رفض أهل الزوج إعطاءها أي شيء هي وأولادها بالرغم من أن الزوج الراحل أثبت في وصيته أن الزوجة هي الوحيدة التي لها الحق في المعاش وأن شقة الزوجية باسم الزوجة.
«اخوات جوزي مش راضيين يدوني حاجة».. بدأت كريمة بهذه الكلمات تروي معاناتها مع أهل زوجها منذ وفاته، مضيفة رفضهم إعطاءها أي مصروفات لها هي وأولادها، أضافت: «في الأول كنت متجوزة من واحد تاني وخلفت منه ولد وبنت بس توفى وبعدها بفترة ربنا عوضني من 6 سنين براجل تاني كويس ومحترم واتجوزنا والحمد لله كنا مبسوطين وكل حاجة كانت تمام».
كريمة تابعت: «كان بيعاملني بما يرضي الله وكان رجل محترم، كان أكبر مني بشوية بس كان معاملته معايا ومع عيالي خليتني أحبه ومكنش بيزعلني إخواته بس هما اللي كانوا بيتدخلوا بينا وبيحاولوا يسلطوه عليا بس هو كان بيحبيني ومبيقبلش عليا أي كلمة وكان بيقف معايا ضدهم».
اخوات جوزي طلعوا سمعة عليا عشان بطالب بحق عيالي
تحولت الحياة من وردية لجحيم تعيشه كريمة بعد وفاة زوجها بسبب معاملة أهله لها ورفضهم إعطاءها حقها، أضافت: في يوم كنا قاعدين عادي وهو راجع من الشغل عشان يتغدى معايا وفجأة شرق ولقيناه فقد الوعي خدنا وروحنا المستشفى بس للأسف كان مات خلاص"، تابعت: "ومن ساعة ما توف ى واخواته طردوني من البيت وقالولي ملكيش عندنا حاجة ومش هنديكي حاجة، كلمتهم كذا مرة وقولت لهم نحل الموضوع ودي بينا قالولي عندك المحاكم لو عايزة ترفعي أي قضايا وورينا هتعملي حاجة".
أكملت كريمة قائلة: «قاعدة عند بيت أهلي من ساعة الوفاة ومش عارفة أصرف عليهم منين، جوزي كان سايبلي الوصية ومكتوب فيها إن أنا اللي ليا الحق بالمعاش وكمان كاتبلي الشقة باسمي وريتهم كل دا وهما برضو مش راضيين يدوني حقي وحق عيالي، رفعت قضية أخر ما زهقت».
انهت حديثها: «وأول لما عرفوا غني رفع القضية طلعوا عليا سمعة إني متجوزة عرفي عشان ميبقاش ليا حق في أي حاجة وطلعت عليا سمعة في الشغل وفي المنطقة إني أنا ست مش كويسة، حسبي الله ونعم الوكيل في كل ظالم وإن شاء الله ربنا يرجعلي حقي وحق العيال».
تابع أحدث الأخبار عبر
