وفاء في دعوى خلع: «رامي بناته وكل يوم مع احدة بفلوسي»
دعوى خلع لجأت لها وفاء بعد معاناة دامت 25 عاما مع زوجها الذي يستغلها من بداية الزواج ويأخذ منها مصروفات ويعتبر أن هذا حقا مكتسبا له من زوجته فكانت الزوجة تصبر كل هذه السنوات من أجل بناتها الاثنين والحفاظ على عش الزوجية وكلها آمال أنه يتغير في يوم من الأيام ولكن الحقيقة أنه تمادى في تصرفاته وأصبح يأخذ ورث والدها من أجل الإنفاق على آخريات.
«بقالي 25 سنة في عذاب».. بدأت وفاء بهذه الكلمات تروي قصتها للقاضي مؤكدة على قصة الحب التي ولدت بينهما قبل الزواج، أضافت: «اتجوزنا عن قصة حب كبيرة وكان كويس معايا أوي في أول الجواز، بس بدأت ألاحظ إنه بتاع ستات وكل شوية مع واحدة شكل اتخانقنا في الأول كتير بس برضو مردتش أعمل مشاكل عشان عيالي».
تابعت: «أخواته هما سبب المشاكل وهما اللي بيحرضوه علي، لقيته جاي يقولي في السنة التالتة من الجواز أنا عايز اتجوز في الشقة، وافقت وسبتله الشقة بتاعتي وعفشي ومشيت أنا وبنتي ومتكلمتش واختي كلمتني عشان تتأكد هسيب حاجتي ولا لأ عشان يتجوز بيها».
ميعرفش حاجة عن بناته وكل ويوم مع واحدة
حاولت الزوجة التأقلم مع الوضع طوال سنوات طويلة ولم تطلب الانفصال من أجل بناتها، ومع ذلك لم يهتم الزوج لأمر بناته ويتركهن بلا سؤال أو مصروفات، أضافت: «مكنش عايش معانا كان بيجي كل سنة يقعد معانا شوية وياخد فلوس مني ويمشي حتى حقوقي الشرعية مش بيدهالي، أنا مكنش عندي مشكلة مع الفلوس اللي بياخدها مني ولا إنه مبيدنيش حاجة ولا مصاريف للعيال كنت بقول مش مشكلة المهم إن علاقته مع بناته تبقى كويسة بس حتى دي مش نافع فيها».
تابعت: «طمع أكتر فيا من ساعة ما ورثت وبقا بيشوفني بس لما بيبقى عايز فلوس غير كدا مبيجيش وبقا فاهم إن دا حق مكتسب ودا حقه، كنت بقوله طب اسأل على بناتك اللي قربوا يتجوزوا وانت متعرفش عنهم حاجة، قالي ميلزمونيش».
انهت حديثها والحسرة تملأ وجهها على بناتها: «مكنش فارق معايا الفلوس وكنت بديله كل اللي هو عايزه بس كنت عايزاه يخلي باله من بناته عشان ميحسوش إن أبوهم ميت وهو على وش الدنيا، لما لقيت مفيش فايدة رفعت قضية خلع عشان زهقت من قرفه».. ولا تزال القضية منظورة في المحكمة حتى الآن.
تابع أحدث الأخبار عبر
