عزة في دعوى خلع: "بعد 15 سنة حب اتصدمت بصوره على السرير مع واحدة"
15 عاما من السعادة التي غمرت عش الزوجية؛ بسبب زوج وأب مثالي وزوجة ترعى بيتها وأولادها بما يرضي الله، ولكن تحول كل شيء في غمضة عين منذ أن تعرف الزوج على امرأة أخرى، وتحول الزوج لشخص آخر، لا يرعى بيته وأولاده؛ ما دفع الزوجة لرفع دعوى خلع.
"كنا عايشين زي الفل".. بدأت عزة بهذه الكلمات تروي قصة حياتها التي تحولت لكابوس بعد أن كانت تعيش أجمل أيام حياتها مع زوجها، وأضافت: "من ساعة ما اتجوزنا واحنا الحمد لله مبسوطين، وبيحصل بيننا مشاكل جامدة، ولو حصل أي حاجة بنلم الموضوع، وبنمشي الدنيا عشان كنا بنحب بعض"، وتابعت: "حتى العيال كان مصاحبهم وبيجيب لهم كل اللي نفسهم فيه، ولا عمره زعلهم. فضلنا طول 15 سنة، بس بدأت كل حاجة تتغير من ساعة ما بقا عنده واحدة في الشغل وبيتكلموا".
اكتشفت الزوجة خيانة زوجها
ظنت الزوجة أن علاقاته مع السيدات في العمل لا تتعدى خط الزمالة والصداقة بحكم صدقها وحبها له، ولكنها اكتشفت ما لم تكن تتوقعه: "لقيته بيكلم واحدة معاه في الشغل، فسألته بتكلمها ليه؟ قال لي عادي دي زميلتي في الشغل ومفيش حاجة بينا. لقيت الموضوع بيزيد وبيتكلموا كتير، وأنا بدأت اتضايق من الموضوع دا وقلت له متكلمهاش تاني، قال لي مش بمزاجك. أنا أكلم اللي أنا عايزه".
وتابعت: "اتخانقت أنا وهو بسببها كتير، وكنت كل مرة لما أقول له فيه حاجة بينكو يتوه ويقول لي انتي عايزة تعملي مشاكل وخلاص؟ في الأول قلت يمكن أنا اللي غلط ومفيش حاجة بينهم، بس لما لقيته لسه بيكلمها مسكت موبايله وفتشته، ودخلت على الشات بينهم، لقيت صور ليهم وهما على السرير".
وأكملت عزة حديثها: "ما صدقتش إنه ممكن يعمل فيا كدا، ولما واجهته في الأول أنكر، ولما قلت له إني عرفت كل حاجة قال لي اعتبريها نزوة، ونرجع تاني لبيتنا. بس أنا مقدرتش ارجع له عشان أكيد هيعملها تاني طالما عملها فيا مرة".
واختتمت: "خدت عيالي ومشيت، ورفعت عليه قضية خلع عشان مبقتش طايقاه ولا طايقة أعيش معاه يوم واحد كمان"، ولا تزال القضية منظورة في المحكمة حتى الآن.
