سارة للقاضي: «سايبني اليوم كله من غير أكل وآخر النهار بيطلع لي بكيس إندومي»
الخداع هو أكثر شيء يدمر العلاقات إذ يتظاهر كل من الطرفين أنه على أكمل وجه من الأخلاق والصدق وأشياء أخرى كثيرة ولكن القناع يسقط عن كل شخص عندما يجتمعان في مكان واحد وتصبح حياتهما واحدة ويجب عليهما التشارك والتعاون والتضحية في بعض الأحيان، وللأسف يوجد كثيرون لا يعرفون معنى الصدق والتعاون بين الزوجين، ما يؤدي لوجود مشكلات كثيرة تنتهي في الغالب بالانفصال.
خداع الزوج
دخل علينا بالحنجل والمنجل.. هكذا استهلت «سارة» قصتها مؤكدة على معاملته الطيبة لها طوال فترة الخطوبة ولكنها اكتشفت الوجه الآخر له بعد الزواج، تابعت: «أنا مكنتش اعرفه في الأول بس لما سألنا عليه عرفنا إنه صنايعي كويس جدًا وسيرته كويسة هو وأهله، واتخطبنا خمس شهور واتجوزنا بعدها على طول»، أكملت حديثها: «وكان مفهمني إنه عنده شقة ملك بس اكتشفت بعد الجواز إنه بيكدب عليا وجايب شقة إيجار عملت مشكلة طبعًا وكنت عايزة اتطلق بس قلت مش مشكلة وعديتها بس اللي خلى بقى في مشاكل كتير إنه وكان كويس معايا أول 3 شهور بس بعد كدا اتحول لواحد تاني».
شردت الزوجة في الماضي البعيد قبل أن تعود لواقعها الأليم «الأول كان بيسب لي 50 جنيه أجيب أكل دلوقتي مبقاش يسيب لي ولا جنيه وكل لما أطلب منه إني عايزة فلوس عشان اعمل أكل يقولي أنا مش معايا اجبلك منين، بقيت بروح عند أمي عشان أكل لأنه سايبني طول النهار من غير أكل وفلوس، واليوم اللي بيطلع لي بأكل بلاقيه جايبلي كيس إندومي».
ازدادت المشكلات بين الزوجين بسبب رفض رب البيت الإنفاق على بيته ما دفعها للتفكير في الطلاق الحتمي، أضافت: «اتخانقنا كتير بسبب إنه مبيسبش فلوس وكل مرة أروح بيت أهلي أقعد فترة وأرجع تاني وأقول عشان البيت مايتخربش ولازم استحمل وكل مرة كنا بنتفق إنه هيصرف على البيت»، تابعت: «لما لقيت المشاكل بتزيد طلبت منه الطلاق وكان كل اللي همه إنه ميدنيش حاجة وابريه بس أنا مرضتش ورفعت دعوى طلاق عشان أخلص من القرف اللي أنا فيه».
انهت سارة حديثها: «لازم أي واحدة هتتجوز تسأل كويس على الراجل اللي هتعيش معاه عشان في رجالة كتير بتضحك على البنات».
تابع أحدث الأخبار عبر
