منال في دعوى نفقة : اتجوز بدهبي .. ومش بيبعت مصاريف لبناته
بعد 20 عامًا من الحب المتناهي بين الزوجين والاستقرار التام في عش الزوجية، فاجئ الزوج زوجته بأنه يريد الزواج من أخرى من أجل إنجاب الولد الذي يحلم به بعد إنجابها للبنات فقط، وافقت منال والنار تأكل قلبها ولكن في نهاية المطاف لم يقدر الزوج ما فعلته من أجله طوال هذه السنوات، وتحول لشخص آخر لا تعرفه بعد أن كان زوج مثالي ما دفع الزوجة ترفع دعوى نفقة بسبب رفضه الانفاق عليهم.
منال في دعوى نفقة : اتجوز بدهبي .. ومش بيبعت مصاريف لبناته
"اتجوز عليا بعد 15 سنة حب وجواز" بهذه العبارة بدأت منال كلامها للقاضي، أضافت: “كنا جيران وساكنين في منطقه واحده وبعد موت أمه وأبوه أمي قررت إنها تجيب أحمد تربيه وسطينا ومن ساعتها وأمي بتعتبره ابنه”.
تابعت منال: "حبينا بعض أنا وأحمد واتجوزنا وأنا عندي 19 سنة وكنا في أسعد أيام حياتنا أحمد كان تاجر خردة وكانت الدنيا معاه ماشيه والحال متيسر بعد كده ربنا رزقنا ببنتين منه، بس بعد 13 سنة جواز بدأت المشاكل بنا وكل حاجه بدأت تتغير للأسوء أحمد كان نفسه يخلف ولد".
تحول مفاجئ
فاجئ الزوج منال بأنه يريد الزواج مرة أخري من أجل الولد الذي يريده، تابعت: “مكنتش متخيلة إني ههون عليه ويطلب مني إنه يتجوز تاني، زعلت طبعًا بس قولت هو نفسه في ولد في حرام عليا لو حرمته من دا”.
أضافت: "بعد ما فاتحني في موضوع الجواز دا قالي أنا عايز ابيع دهبك عشان مزنوق في الفلوس واديته دهبي كله، بعدها بشهر لقيته اتجوز وعرفت إنه اتجوز بدهبي".
تحول الزوج منذ أن تزوج للمرة الثانية، وبدأ يهتم بأولاده من الزوجة الثانية ويطرق بناته مع والدتهم من غير أي سؤال أو مصاريف، أكملت: "اتجوز على طول مستناش حتى إني أوافق، ومكنتش أعرف إنه هيتبدل ويبقى واحد تاني كدا عشان من ساعة متجوز وهو مبقاش يقعد معايا أنا والبنات ومبقاش يصرف علينا".
تابعت: "بعدها بفترة اشترى عمارة وأنا وبناتي قعدنا في شقة وضرتي في شقة وبرضوا، ولا فكر يسأل علينا وقالي أنا مش عايزكم أنا عندي غيركم ولادي ومراتي التانين"، أضافت: "بعد 10 سنين علي الحال ده قررت إني أنفصل عنه وأرجع بيت أهلي هو كده كده ولا بيصرف علينا ولا بيسأل عليا ولا أنا ولا بناتي".
أنهت منال حديثها بالقول: "زهقت وطلبت الطلاق واتطلقنا ورجعت بيت أهلي أنا والبنات ومكنش بيرضي يبعت لأولاده مصاريف، كانت أمي وأخواتي هما اللي بيصرفوا علينا بنتي في كلية هندسة علطول يقولها أنا مش هخليكي تكملي تعليمك بس أخويا قال إنه هيخليها تكمل تعليمها"، من شهر قررت إني ارفع عليه قضية نفقه وتمكين عشان أقدر أصرف على عيالي ولا تزال القضية منظور حتى الآن.
تابع أحدث الأخبار عبر
