شيماء في دعوى خلع: «جري ورايا عشان أرجع له وبعدها بشهر اغتصب بنت عمه»
تلجأ زوجات كثيرات للقضاء بعد أن يفيض بهن الكيل بسبب ما يفعله الأزواج، منهن تلجأ لرفع دعوى خلع، أو طلاق، أو طلاق للضرر للتخلص من حياتهن البائسة بأي ثمن نتيجة أفعال أزواجهن التي تتمثل في الخيانة، الضرب وأسباب أخرى كثيرة، ومن ضمن هذه الحالات «شيماء»، التي رفعت دعوى خلع بعد علمها بأن زوجها اغتصب ابنة عمه.
"بقالي 10 سنين بفوت له".. بدأت الزوجة تروي قصتها، مؤكدة على معاملة الزوج الطيبة لها ولأولادها منذ بداية الزواج ولكن الأمر لم يخلو من خلافات عادية بين الزوجين فكانت تتغاضى عن الخلافات بينهما من أجل الحفاظ على بيتها، تابعت: «في أول الجواز كان كويس معايا جدًا وبيصرف كويس علينا بصراحة حتى لو حصلت أي مشاكل وروحت عند بيت أهلي برضو بيبعتلي مصاريفي أنا والعيال».
أضافت شيماء: «حصلت بينا مشاكل كذا مرة بسبب إنه بيضربني وسبت له البيت ومشيت كتير وكنت بعدي الموضوع عشان المشكلة متكبرش بس مبقتش قادرة استحمل خلاص وطلبت منه الطلاق بس رفض وقررت رفع دعوى خلع وفعلًا خلعته بس بعد فترة جالي وطلب مني إنه يرجع تاني ولسه بيحبني وأهلي قالولي ارجعي وفعلًا رجعت قولت عشان عيالي».
اكتشاف غير متوقع
ظنت الزوجة أن الحياة ستصبح أكثر استقرارا بعد العودة من أجل أولادها ولكنها اكتشفت شيئا غير متوقعا ما جعلها تلجأ للخلع مرة تانيةً بدون تردد، أضافت شيماء: «بعد ما رجعت كنت فاكرة الأمور هتبقى أحسن وكل حاجة هتبقى تمام بس اكتشفت حاجة مكنتش تيجي في بالي أبدًا، في يوم لقيت مرات عمه بتكلمني وبتقولي انتي رجعتي لجوزك ليه دا اغتصب بنتي، الكلام دا كان بعد ما رجعلي بشهر".
أكملت حديثها وعلى وجهها علامات الصدمة: «مصدقتهاش وقلت أكيد بتكدب طلبت منها انها تبعتلي صور المحضر اللي عملته عشان أصدق وفعلًا طلع كلامها صح وهو عمل كدا»، شردت شيماء بسبب ما سمعته ما دفعها للجوء إلى المحكمة والخلع مرة ثانية، انهت حديثها: «لما عرفت اللي عمله روحت تاني يوم المحكمة على طول ورفعت دعوى خلع عشان أخلص من القرف اللي أنا فيه، رافعة القضية بقالي 4 شهور وباقي لي أخر جلسة وبعدها هيصدر الحكم».
