أخبار محكمة الأسرة اليوم
سهر تطلب نفقة: بصرف على البيت وهو بيضيع فلوسه على كلام فاضي
أقامت «سهر» دعوى نفقة في محكمة الأسرة للحصول على مصاريف ابنها المريض، والإنفاق على باقي ابنائها ودفع مصروفاتهم المدرسية، ولجأت لمحكمة الأسرة بعدما ترك زوجها المنزل وهرب رافضا الإنفاق على الأبناء.
قصص محكمة الأسرة.. مكنتش اعرفه كويس قبل الجواز
«رضينا بالهم والهم مش راضي بينا» هذا ما بدأت به «سهر» حديثها وتابعت قائلة: «أنا جيت المحكمة عشان ارفع على جوزي قضايا بعد جواز دام 13 سنة وخلفت منه 4 أولاد منهم ولد مريض، اتجوزنا جواز صالونات عادي ومكنتش اعرفه كويس قبل الجواز، وبعد الجواز الحقيقة بانت وكل حاجة كان مخبيها عليا قبل الجواز عرفتها».
دعاوي محكمة الأسرة..نزلت اشتغل عشان أساعده
أكملت «سهر» حديثها وقالت: «من ساعة ما جوزي اتقدملي واتجوزنا وأنا عارفة إن ظروفه المادية صعبة، بس عمري ما اشتكيت ووقفت معاه وساعدته عشان نعمل حاجة لينا وللعيال ومنبقاش محتاجين لحد، نزلت واشتغلت وبقيت أساعد في مصاريف البيت ومكنش عندي مشكلة خالص لكن هو عمره ما قدر مساعدتي ليه».
حكايات محكمة الأسرة.. مبيسألش على علاج ابنه
تابعت «سهر» حديثها قائلة: « بعد فترة لقيت إني مسؤولة عن كل حاجة في البيت وكل المسؤولية عليا لوحدي وهو مكبر دماغه، ابني عنده ربو وحساسية على الصدر وأنا اللي كنت مسؤولة عن علاجه وكل حاجة تخصه هو ملوش دعوة، كان بيديني 200 جنيه في الشهر للإيجار وتعليم العيال وأنا أكمل، كل ما أقوله عايزة فلوس يقولي مفيش، فلوسه ضيعها على حجات تافهة واستخسرها في بيته وولاده، حصل بينا مشاكل كتير بسبب المصاريف ومع آخر مشكلة مشي وسابلنا البيت وكبر دماغه عن كل حاجة».
مش عارفة أكفي مصاريف ولادي
أنهت «سهر» حديثها قائلة: «من ساعة ما مشي رمانا وبقى مبيسألش فينا، جيت ارفع قضية نفقة عشان حاجات كتير، ابني محتاج علاج كتير وأنا مش قادرة اكفيه لوحدي، مش عارفة ادفع حق مصاريف المدرسة لولادي، ومش عارفة ادخل بنتي الصغيرة حضانة، ولا أعيش زي البني آدمين».