أخبار محكمة الأسرة اليوم
«متجوزه مدمن».. أمنية لـ محكمة الأسرة: زور تحاليل المخدرات قبل الجواز وضحك عليا
بعد اكتشاف «امنية» الكذبة التي كانت تعيش فيها توجهت لأبواب محكمة الأسرة بحثًا عن نهاية لحياتها مع زوجها الذي وقعت في حبه ولكنه كان يكذب عليها قبل دخولهم بيت الزوجية زور التحاليل التي كانت تثبت أنه مدمن للمخدرات، وبعد اكتشافها كذبته وأنه مازال مدمن للمخدرات توجهت لمحكمة الأسرة ورفعت دعوى خلع لتحصل بها على حريتها منه.
قضايا محكمة الأسرة.. كويس إني مخلفتش منه
بدأت «أمنية» حديثها وقالت: «أنا متجوزة من سنتين كان جواز عن حب وجوزي كان كويس جدا في أول ما عرفنا بعض، اتقدملي ووافقت عليه وفي الخطوبة وأول الجواز مكنش فيه مشاكل غير قليلة وكنا بنحب بعض والدنيا ماشية، طول جوازنا مخلفتش منه وكويس إني مخلفتش منه».
دعاوي محكمة الأسرة.. عرفت من تحاليل الجواز إنه بيشرب مخدرات
أكملت «أمنية» حديثها وقالت: «جوزي كان بيشرب مخدرات من ساعة ما عرفته بس أنا مكنتش أعرف إنه بيشرب، عرفت لما كنا بنعمل تحاليل قبل الجواز التحاليل وقتها بينت انه بيشرب مخدرات، لما عرفت عملت مشكلة كبيرة معاه وكنت هسيبه، وهو وقتها وعدني إنه هيبطل ومش هيشرب تاني».
حكايات محكمة الأسرة.. طلع لسه بيشرب مخدرات
تابعت «أمنية» حديثها قائلة: «صممت إننا قبل الجواز نعمل تحاليل تاني عشان أتأكد إنه مبقاش يشرب ووقتها التحاليل طلعت كويسة مفيهاش حاجة وبان فيها إنه بطل مخدرات ومبيشربش فرحت وقتها واتجوزنا عادي على أساس إنه مفيش مخدرات، بعد الجواز بفترة شكيت إنه بيشرب مخدرات واكتشفت بعد كدة انه لسه بيشرب مخدرات وقتها واجهته وأنكر، بس أنا كنت لقيت المخدرات اللي مخبيها ولما ملقاش فايدة مأنكرش وقالي مش هبطل».
قضايا محكمة الأسرة..لما بيشرب بيتجنن
أنهت «أمنية» حديثها قائلة: «في الأخر عرفت إنه طلع كان مزور التحاليل اللي عملناها قبل الجواز، وفهمني في الخطوبة إنه بطل شرب المخدرات وهو كان لسه بيشرب عادي، وفضلت معاه فترة عشانه بحبه ومش عايزة أخسره وكان عندي أمل يتعدل لكن مفيش فايدة لما بيشرب بيتجنن وبيبقى واحد تاني على طول عصبي وصوته عالي وبيغلط كتير، وآخر ما زهقت منه ولقيته مش هيبطل قررت أجي المحكمة أرفع عليه قضية خلع لأنه رافض يطلق ودي».