أخبار محكمة الأسرة اليوم
مريم.. لـ محكمة الأسرة: مفهمني انه محترم وفي الأخر طلع تاجر مخدرات
كانت صدمة «مريم» في حب حياتها ومن اختارته أن يكون سند وضهر لها في الدنيا كبيرة حتى اوصلتها لأبواب محكمة الأسرة ، عندما شكت الزوجة في سلوك زوجها مالم تتوقعه أبدا أنه سيكون تاجر للمخدرات وسيدمر اسرتها وحياتها بسبب افعاله ، وعندما أجرت محاولة أخيرة في أن تصلح حال زوجها بائت محاولتها بالفشل وانتهت حياتها الزوجية التي بدأت بقصة حب بضربها ضرب مبرح من زوجها، واضطرت وقتها أن تتوجه لمحكمة الأسرة حتى تضع كلمة النهاية لقصتها.
قصص محكمة الأسرة..أهلي وافقوا عليه عشان خاطري
قالت «مريم» في بداية حديثها: «أنا اتجوزت من ٨ سنين ومخلفة من جوزي بنت وولد بس، اتجوزنا عن طريق قصة حب بيني وبين جوزي، اتعرفت عليه وكان طيب جدا وابن حلال وبيحبني، بعد الفترة اللي اتعرفنا فيها على بعض اتقدملي وأهلي وافقوا عليه عشان خاطري وكل حاجة كانت ماشية كويس».
دعاوي محكمة الأسرة..حمدت ربنا على جوزي
أكملت «مريم» حديثها وقالت: «بعد الجواز والخلفة كل حاجة كانت كويسة هو كان مش مخليني محتاجة حاجة أنا أو العيال، وكان كويس معايا ومع أهلي وكنت مبسوطة و حمدت ربنا على النعم اللي كنت عايشة فيها، لحد من 3 سنين شكيت فيه كانت تصرفاته غريبة وطريقته متغيرة معايا شكيت إنه يعرف عليا واحدة بس ملقتش حاجة عليه، فضلت أدور وراه لحد ما لقيت مخدرات كتير في جيبه ».
حكايات محكمة الأسرة..جوزي تاجر مخدرات
تابعت «مريم» حديثها قائلة: « افتكرت وقتها إنه مدمن مخدرات، لما واجهته بالمخدرات اللي لقتها معاه في الأول انكر وقال أنها مش بتاعته لكن بعد كدة قال إنه بتاعته بس هو مش بيشرب ده بيبيع، طلع كان بيبيع مخدرات من زمان وأنا معرفش، حاولت معاه إنه يبطل ويبقى كويس افهمه إنه ماحنا مش محتاجين فلوس حرام بس مفيش فايدة، كل ما يقولي هيبطل تطلع حاجة تبين إنه بيكدب، لحد ما وصل الأمر الناس بقت تيجي تشتري منه في البيت ».
قضايا محكمة الأسرة..سابني ومسألش فيا
أنهت «مريم» حديثها قائلة: «أخر ما تعبت منه سيبت البيت وقلتله يا يبطل اللي بيعمله يا إما مش هرجعله، سابني ومسألش فيا حاولت أكلم أهله عشان يعقلوه طلعوا ميعرفوش ولما عرفوا بهدلوه، لما عرف إني قلتلهم جه وضربني في بيت أهلي، دلوقتي سايباه بقالي سنتين و رافعة الخلع من شهر بس ».