أخبار محكمة الأسرة اليوم
محكمة الأسرة.. سهام : عملي عاهة مستديمة عشان تهيؤات في دماغه
لجأت «سهام» لمحكمة الأسرة لتكون ملجأها الأخير بعد الحياة الصعبة التي عاشتها مع زوجها المدمن، وكان يملأها الإهانات والضرب ولسنين تحملته الزوجة حتى لا تخرب بيتها وتدمر حياة ابنتها الوحيدة، ولكن عندما وصل الأمر أنها ممكن أن تخسر حياتها قررت أن تنهي هذا العذاب وتحصل على نهاية لزواجها عن طريق محكمة الأسرة.
قضايا محكمة الأسرة.. رافعة قضية طلاق للضرر
بدأت «سهام» حديثها وقالت: «أنا متجوزة جواز قرايب بقالي 13 سنة وخلفت من جوزي بنت واحدة بس، ورافعة عليه طلاق للضرر بقالي دلوقتي 6 شهور، ومن ساعة ما رفعت القضية وأنا متبهدلة في المحاكم بسببه، كنت صابرة عليه كتير بقالي 13 سنة صابرة خلفت منه ولد بعد 7 سنين جواز واتوفى وخلفت بعدها بنتي».
دعاوي محكمة الأسرة..بقى واحد تاني بعد شرب المخدرات
أكملت «سهام» حديثها وقالت: «الحياة في أول الجواز كانت هادية ومفيش مشاكل، لحد بعد اول سنتين جواز بس جوزي بقي يشرب مخدرات، وعرفت لما شوفته، وبعد المخدرات بقي واحد تاني، بقى بيضربني ويشتمني ويبهدلني وهو عمره ما كان بيعمل كدة زمان».
حكايات محكمة الأسرة.. جوزي عملي عاهة مستديمة
تابعت «سهام» حديثها قائلة: «الضرب هو كان مشكلتي معاه وبدأ بعد الجواز بسنتين مع بداية شربه للمخدرات، بيضربني من زمان وأنا بسكت وأعدي عشان بيتي وبنتي كان بسبب ومن غير سبب، لو السماعة اتقطعت يقولي إنتي اللي قطعتيها ويمسكني يضربني، لحد أخر مشكلة كان عامل حادثة ورجله اتكسرت وقتها قال على اخواتي إن هما اللي كسروا رجليه وأنا اخواتي معملوش حاجة دماغه اللي بيتهيأله فيها كدة، وقالي هجبلك عاهة مستديمة زي ما اخواتك عملوا معايا، ضربني بالكاتر وعملي عاهة مستديمة».
قضايا محكمة الأسرة.. شوهني ودخلت بسببه المستشفى
أنهت «سهام» حديثها قائلة: «سايباه بقالي 10 شهور من ساعة أخر مرة ضربني وشوهني دخلت المستشفى ولما خرجت قررت مش هكمل معاه، وخدت العفش ورفعت نفقة وطلاق للضرر بالتقرير الطبي بعد ضربة الكاتر مبيسألش فيا ولا في بنته ولا بيتقي ربنا فينا بعد ما صبرت عليه طول السنين دي».