أخبار محكمة الأسرة اليوم
سمية لـ محكمة الأسرة : حماتي خاربه بيوت أولادها وبتطلع عقدها فينا
دعوى الخلع والنفقة التي رفعتها «سمية» في محكمة الأسرة كان سببها حماتها التي جعلت مهمتها الأساسية في الحياة تدمير حياة أبنائها الثلاثة الزوجية، كثرت محاولات «سمية» في الحفاظ على بيتها وأسرتها من تدخلات حامتها الخارجية التي كانت كل نيتها الخراب لكن بائت كل هذه المحاولات بالفشل واضطرت أن تتوجه لمحكمة الأسرة في النهاية بالرغم من صعوبة هذا القرار عليها.
قصص محكمة الأسرة..امه بتتدخل في كل القرارات من زمان
قالت «سمية» في بداية حديثها: «أنا متجوزة جواز صالونات بقالي ١١ سنة ومخلفة من جوزي ولد وبنت، وسايباله البيت بقالي تقريبا سنة، طول فترة الخطوبة مكنش فيه مشاكل غير العادية كان شخص محترم جدا، بس من ساعة ما اتقدملي وهو باين إن امه بتدخل في كل حاجة وكل القرارات».
دعاوي محكمة الأسرة..بتقوم جوزي وتولع الدنيا
أكملت «سمية» حديثها وقالت: «لحد ما سيبت جوزي كل المشاكل بينا كانت عادية جدا زي أي اتنين متجوزين، المشكلة الأكبر كانت في حماتي، كانت بتولع الدنيا بيني وبين جوزي ومش مخليانا نعرف نعيش مرتاحين، كنا معظم الوقت في مشاكل بسببها كانت طول الوقت بتتدخل في كل كبيرة وصغيرة في حياتنا ولو فيه بينا مشكلة تولعها وتقوم جوزي عليا وتكبر المشكلة».
حكايات محكمة الأسرة..عايزة تطلع اللي عاشته في حياتها علينا
تابعت «سمية» حديثها قائلة: «كانت ست صعبة جدا وكانت خاربة بيوت أولادها الصبيان التلاتة، اخوات جوزي الكبار كانوا مطلقين بسببها وبسبب تدخلاتها الكثيرة اللي محدش يستحملها، كل اللي عاشته في حياتها بتكرره في كل ولادها، زمان جوزها اتجوز عليها واحدة تانية وسابها، وهي اللي ربت التلات صبيان لوحدها ازاي بقى تسيبك تعيشي حياتك مرتاحة، استحملت كتير عمايلها وكلامها وتدخلها في كل حاجة عشان مخربش بيتي وولادي يتبهدلوا».
قضايا محكمة الأسرة..مبيسالش غير كل فين وفين
أنهت «سمية» حديثها قائلة: « بعد ما صبرت كتير واستحملت زهقت منها ومن عمايلها وجوزي مكنش بيقف معايا خالص، كان بيحاف على زعل امه داينا ويقول امه اللي مربياه ميقدرش ميعملش اللي هي عايزاه، لحد ما سيبته انا والعيال وهو راح قعد معاها ومبقاش يسال غير كل فين وفين وجيت المحكمة عشان ارفع عليه قضية خلع ونفقة».
تابع أحدث الأخبار عبر
