أخبار محكمة الأسرة
ندى لـ محكمة الأسرة : ملوش أمان ومبيصرفش غير بالمشاكل
كانت «ندى» في محكمة الأسرة تبحث عن حقوقها من زوج ظالم لم يصونها أو يرعاها أبدًا وعندما ظنت أنه خطأها اكتشفت أنها ليست أول مرة يقوم بها الزوج بفعلته؛ فقد كان له زوجة وابن سابقين وحرمهما من حقوقهما مثلما حرمها هي وابنها، واضطرت الزوجة وقتها أن تتوجه لمحكمة الأسرة حتى تبحث عن حقوقها حتى لا يضيع حقها مثلما ضاع حق من قبلها.
قصص محكمة الأسرة.. اتجوزت جواز صالونات واتسرعت
قالت «ندى» في بداية حديثها : «اتجوزنا 7 سنين وخلفت منه ولد، كان جواز صالونات والدنيا كانت كويسة كان عريس مناسب جدًا مقتدر ماديًا ومحترم ومن عيله كويسه وكانوا ناس محترمة وناس مناسبة اتجوزته على طول واتخدعت في الشكل ودلوقتي سايباه بقالي سنة».
حكايات محكمة الأسرة.. مبيصرفش غير بالمشاكل
تابعت «ندى» حديثها قائلة: «جيت المحكمة ورفعت عليه القضية بعد سنين اتحملته واتحملت عمايله بس كنت تعبت منه خلاص وجبت اخري من ساعة ما اتجوزته وانا في مشاكل مع جوزي، كان مبيصرفش خالص ولو صرف بيصرف بمشكلة وخناقة وبهدلة وإهانة».
دعاوي محكمة الأسرة.. عنده ولد راميه غير ابني
أضافت الزوجة: «بعد ما اتحملته سنين زهقت منه ومن المشاكل وقررت اسيبه وبعدما سيبته ورحت عند أهلي ومن وقتها هو مسألش ولما كلمت أهله عشان يشوفوا حل قالولي مش قادرين عليه وطلع انه كان متجوز قبل كدة وعنده ولد وراميه ومش بيسأل فيه هو وامه وبيعمل معاهم زي ما بيعمل معايا انا وابني وانا مكنتش اعرف الكلام ده قبل ما اتجوزه».
قضايا محكمة الأسرة.. رفعت قضايا نفقة ومش عارفة اخد حقي
أنهت «ندى» حديثها قائلة: «رفعت عليه قضايا نفقة ومسكن عشان خاطر حقي انا وابني لكن معرفتش اخد منه فلوس غير قليل لأن شغله حر ومقدرتش اثبت غير اني اخد منه حاجة بسيطة وهو كان عارف اني مش هقدر اخد منه حاجة بسبب اني مش هعرف أثبت حاجة، ومبيسألش في ابنه ولا في مصاريفه وبيدفع فلوس النفقة القليلة اللي مبتكفيش حتى الأكل والشرب وبحاول اجيب شهود ان معاه فلوس وعنده أملاك عشان أعرف ازود النفقة وبقالي شهور في البهدلة دي».