«متجوزه خيال مآتة».. علا : ميعرفش حاجة عني ومعتمد عليا في المصاريف
توجهت علا نحو مجمع محاكم شبرا لتقييم دعوى طلاق ضد زوجها بعدما عانت لأكثر من 10 سنوات بسبب عدم تحمله المسئولية نهائيًا من بداية الزواج فكان هذا سبب الخلاف المستمر بينهما، وعندما تصاعد المشكلات على السبب ذاته قررت أن تطلب الانفصال منه ولكنه رفض ما جعلها تلجأ نحو محكمة الأسرة من أجل رفع دعوى طلاق.
"مش عارفة أعمل معاه إيه.. مش معايا أنا والعيال وكل ما أطلب منه حاجة مبيعملهاش خالص" بهذه الكلمات بدأت الزوجة حديثها لقاضي المحكمة مؤكدة على أنه حاولت معه كثيرًا لحل هذه الخلافات ولكنه يتمادى في تبلده تجاهها هي والأولاد.
تابعت: "في الخطوبة مكنش بارد كدا خالص وكان على طول يتكلم معايا ولو في أي مشكلة نقعد نحلها مع بعض، إنما بعض الجواز اتغير خالص مش فاهمة إيه السبب".
وجوده زي عدمه
فوجئت علا بشخصيته الجديدة التي ظهرت بعد الزواج، ولكنها حاولت أن تساير أمورها وتجد حل لهذه المشكلة ولكن الأمور تصاعدت أكثر وأكثر، وفي كل مرة كان ينتهي النقاش بمشكلة كبيرة.
أضافت علا قائلة: "قاعد في البيت مبيعملش أي حاجة ووجوده زي عدمه، ولو احتاجته في أي حاجة ولا كأنه هنا أصلا، على الحال دا طول الوقت معايا أنا والعيال، حتى الشغل قعد منه ومبقاش يصرف عشان معتمد إني كدا كدا بشتغل وبجيب فلوس فبقى معتمد عليا في كل مصاريف البيت"، تابعت: "لما باجي أقوله عايزة فلوس للعيال يقولي وأنا مالي ما انتي بتصرفي هصرف أنا ليه، كلمت أهله عشان يعقلوه بس برضو مفيش فيه فايدة".
متجوزة خيال مآتة
سئمت الزوجة من الخلافات والمشكلات المستمرة بسبب تبلده الزوج ورفضه الإنفاق على أي شيء في المنزل، تستكمل علا حديثها قائلة: "مش مستفادة منه أي حاجة، وجوده زي عدمه بالنسبة لي لإن الفلوس حتى مبيصرفش جنيه على البيت أصلاً، كأني متجوزة خيال مآتة بالظبط، ولا فلوس بيديني ولا بلاقيه في أي مشكلة، بعد 10 سنين فاض بيا بقى وجبت اخري من العيشة اللي أنا عايشاها معاه دي"، كان الفرار منهذه الحياة هو الأفضل لها بعد كما وجدت نفسها هي المسئولة الوحيدة على كل أعباء المنزل دون مشاركة زوجها.