منى في دعوى طلاق :"أمه حطاني في دماغها وزحلقتني بصابون المواعين"
خلافات بدأت من أول أسبوع في الزواج كان السبب فيها هم أهل الزوج الذين يتلككون لها على الصغيرة والكبيرة وخصوصًا والدته ما أدي لتصاعد المشكلات مرة تلو الأخرى، وكانت الزوجة تجاري أمورها من أجل الحفاظ على حياتها وزوجها ولكن تمادت المشكلات وأصبحت غير قادرة على تحمل التلكيكات والمشكلات أكثر من ذلك ما دفعها تلجأ لدعوى طلاق.
حماتي قارشة ملحتي من أول الجواز
أرادت منى أن تعيش في هدوء مع شريك حياتها دون تدخل أي طرف أخر في حياتهما ولكن الحياة لم تجري كما ارادت ووجدت التدخل في حياتها يزداد يوم عن يوم من أهل زوجها، استهلت منى قائلة: "اتخطبنا 6 شهور، ماما هي اللي جيباهولي يعني صالونات بس هو كان كويس جدًا في فترة الخطوبة وحبيت شخصيته، ومكنش في أي مشاكل في الخطوبة والدني كلها كانت تمام بس من أول أسبوع في الجواز والمشاكل بدأت بسبب أمه اللي بتدخل في حياتنا بطريقة غريبة".
أضافت: "كنت بحاول أرضي أمه عشان نبقى كويسين مع بعض، بس هي مكنتش حباني خالص ومن أول الجواز وهي قارشة ملحتي مش عارفة ليه مع إني بساعدها في كل شغل البيت من غير ما هي تقول حتى وكمان بتسخن جوزي على ليل ونهار وبتحب تشوفنا بنتخانق على طول".
أمه زحلقتني بصابون المواعين
فشلت كل محاولات الزوجة التي حاولت بها أن تجعل العلاقة بينها وبين حماتها أحسن بسبب تصرفاته التي جعلت الزوجة لم تقدر على التحمل وتفكر في الانفصال، تابعت منى: "بتكلمني طول الوقت من تحت درسها من غير ما أعملها حاجة، وحصلت خناقات كتير وسبت البيت كتير بسببها وكل مرة جوزي يرجعني ويقول لي خلاص أخر مرة مش هخليها تتدخل تاني بس مفيش فايدة".
أضافت: "في يوم بفتح باب الشقة اتزحلقت في صابون المواعين وعرفت إنها حاطه صابون مواعين عشان اتزحلق، ولما قلتلها ليه كدا قالتلي أن مش عايزاكي لابني، وكل يوم افتح الباب الاقي الصابون محطوط قدام الشقة لحد ما زهقت"
اختتمت حكاياتها: "خلاص مش قادرة استحمل اللي أمه بتعمله فيا وطلبت منه الطلاق بس هو مش موافق، ولما لقيته مصمم إنه ميطلقنيش، رفعت دعوى طلاق بقالي شهرين ولسه ماشية في الإجراءات".