منى في محكمة الأسرة: أعمام بنتي واكلين ورثها عشان هي بنت
لم تفق «منى» من صدمة وفاة زوجها وتركه له ولابنتها الصغيرة إلا ووجدت نفسها تواجه أشخاصا أعماهم الطمع والغل والكره تجاهها هي وابنتها اليتيمة، وكان هؤلاء الأشخاص هم أعمام ابنتها وإخوه زوجها المتوفى.
تزوجت «منى» وكانت حياتها طبيعية مع زوجها، كان زوجها يتقي الله فيها وفي ابنتهما، ولم يكونا يحتاجان لأي شيء في وجوده، فكان يلبي لهما كل طلباتهما، حمدت «منى» الله على نعمه التي أنعم عليها بها، كانت تعيش لتربى ابنتها وترعى زوجها، ولكن تأتي الرياح بما لا تشتهي السفن، فاستيقظت «منى» في يوم من الأيام على خبر وفاة زوجها، ووقتها لم تتوقع أن توصلها أطماع أهل زوجها لمحكمة الأسرة في النهاية.
اقرأ أيضا
قالت «منى»: اتجوزت من 2018 والحياة بيننا كانت مستقرة ومفيش مشاكل، جبت منه بنت عندها دلوقتي 4 سنين، وكان بيصرف علينا ومش مخلينا محتاجين حاجة لحد، في سنة 2020 اتوفى في حادثة عربية فجأة، كانت صدمة كبيرة عليا وعلى بنتي.
«منى»: أهل جوزي طردوني من شقتنا بعد وفاته وسرقوها
لم يكفِ إخوه زوج «منى» أن ابنة أخيهم تيمت في هذه السن الصغيرة، وانحرمت من حنان أبيها عليها، وأن تعيش في أمانه طول حياتها، بل زادوا على جرحها بأنهم تركوها هي وأمها وحدهما في هذه الدنيا بدل أن يكونوا سندا لهما بعد الخسارة الكبيرة التي واجهتاها.
وأضافت «منى»: من ساعة وفاة جوزي وأنا في مشاكل مع أهله وأنا مش عايزة مشاكل، أنا عايزة حقي أنا وبنتي، بعد الوفاة قعدت فترة عند أهلي اتفاجئت لما رحت أجيب هدوم ليا أنا والبنت وملقتش حاجة في البيت خالص، أهل جوزي طردوني أنا وبنتي من الشقة، وباعوا كل عفشي اللي فيها من ورايا، ودلوقتي أعمام بنتي مش عايزين يدوها حقها عشان هي بنت بيقولوا لو ولد كنا ادينا له كل حاجة.
وتابعت «منى»: بنتي ليها في حق أبوها عمارة و3 محلات مش عايزين يدوها أي حاجة، حاولت أتفاهم مع أعمام بنتي وعمتها، لكن لما اتكلمت معاهم قالوا عايزين يشتروا نصيب البنت بـ 40 ألف جنيه، وطبعا هي ليها أكتر من كده.
«منى»: مش هسيب حق بنتي اليتيمة
وقالت «منى» عن معركتها في محكمة الأسرة ضد أسرة زوجها الراحل: بقالي في المحكمة سنة ونص دلوقتي، هما اللي معطلين القضايا؛ لأنهم مبيحضروش، لجأت للمحكمة لما ما لقتش حل تاني وغلبت معاهم ومش راضيين يدوا بنتي حقها، رفعت دعوى وصاية وبعد كده عملت إعلان وراثة عشان أعرف أجيب حقها، عملت محضر بالحاجات اللي اتسرقت مني واتحفظ، وكل حاجة ضاعت عليا، المحامين قالوا لي إن فلوس الحاجات اللي اتاخدت دي أقدر آخدها منهم بعدين، لكني ما خدتش منهم أي حاجة من حقي لحد دلوقتي، أنا دلوقتي عايشة مع أهلي وباشتغل وباصرف على بنتي، بس أنا مش هاسيب حق بنتي؛ لأن دي يتيمة واللي بيحصل لها ده ما يرضيش ربنا.