«حتى الغيرة مفيش».. سحر بدعوى خلع: "عايشين في بيت واحد ولا يعرف عننا حاجة"
حياة زوجية تنعم بالسعادة والتفاهم بين الزوجين الذي يهون كل الأوقات الصعبة التي تمر عليهما، استمرت هذه الحياة المثالية على هذه الوتيرة لمدة 8 سنوات، ولكن انقلب كل شيء وأصبحت المشادات والمشكلات جزء أساسي من حياتهما وتحول كل التفاهم والسعادة لحزن تعيشه الزوجة ليلًا نهارًا بسبب الزوج الذي أصبح لا يعرف أي شيء عنها هي والأولاد نتيجة إدمانه المفرط للمخدرات.
خطت سحر خطواتها نحو محكمة الأسرة بعد ما أدركت أن الحل الوحيد لحياتها هو الانفصال بعدما تحولت حياتها من حياة مستقرة سعيدة لحياة يسكنها التعاسة بسبب زوج تخلى عن هذه الحياة السعيدة مقابل مزاجه وكيفه الذي قلب حياتهما وتحوله لشخص لا يلتفت لزوجته وأولاده، لذلك قررت أن تستغيث بقاضي المحكمة وتشهده على حياته البائسة بسبب زوجها وبدأت قصتها بكلماتها قائلة: "كنا جواز صالونات عادي بس لما عرفته كويس في الخطوبة حبيته وحبيته أكتر لما اتجوزنا بسبب أسلوبه وتعامله معايا اللي كان كله تفاهم بينا، حياتنا كانت زي الفل الحمدلله والناس كانت بتحسدنا على التفاهم اللي بينا".
حاولت أعدي الدنيا عشان العيال
أكملت حديثها: "فضلنا كدا لحد 8 سنين وبعد كدا لاحظت التغير اللي بان في تعامله معايا وأسلوبه اللي بقى كله عصبية ومبيتفهمش، استغربت إيه اللي غيره أوي كدا بس بقى يرجع لي في نص الليل وهو حالته بالبلا".
بسبب سهر الزوج المتكرر كل يوم علمت الزوجة بإدمان زوجها ومن هنا تحولت حياتها التي كانت تسير على وتيرة واحدة من الهدوء التفاهم المتبادل بينهما، وبدأت المشكلات والخلافات تعتري عش الزوجية طوال الوقت بسبب إهمال الزوج لبيته وأولاده.
أضافت سحر: "مبقاش يعرف عني حاجة أنا والعيال وطول اليوم برا وكل ما أجي أكلمه على حاجة ميتفهمش معايا وعلى طول ضرب، حاولت أصلح الدنيا أكتر من مرة بس للأسف معرفتش".
ميعرفش حاجة عننا ومبيغيرش عليا
تابعت الزوجة حديثها: "دا غير بقا إن ميعرفش حاجة عن العيال ولو قاعد معانا في البيت وبيبقى ولا كأنه معانا، حتى الغيرة مبيغيرش علي لو قلت له أنا رايحة فين عادي هيسيبني أروح لوحدي بالنسبة له عادي أي حاجة عشان مش واعي لأي حاجة بتحصل حواليه ومع الوقت بيزيد".
فقدت الأمل في صلاح الحال وهذا الذي جعلها تتجه نحو محكمة الأسرة ورفع دعوى خلع لتتخلص من حياتها التي يحاوطها المخدرات ويحاوطها معها الحسرة على حياتها التي انقلبت فجأة بعد اتجاه الزوج للإدمان.