عقله طار من المخدرات.. إيمان في دعوى خلع: ولع في البيت وهرب
لم تكمل "إيمان" عامها الأول في عش الزوجية الجديد، حتى تحطمت كل أحلامها السعيدة التي خططت لها وتحول المنزل لجحيم لا ترى فيه يوما سعيدا، فلا تعرف أي شيء سوى التعاسة والحزن بسبب زوجها الذي عرف طريق المخدرات وعرف معه الإهانة والضرب المستمر لها هي والأولاد وظلت الزوجة على هذا الحال لمدة 15 عاما كلما تنوى الفرار من حياتها التعيسة ترجع في قرارها من أجل أولادها.
15 عاما فكرت فيهم إيمان مئات المرات للخلاص ولكنها تعمل حساب لأولادها الثلاثة وأخر المطاف كان في محكمة الأسرة وبدأت تروي قصتها وكانت أولى كلماتها هي: "طول الـ 15 سنة وأنا عايشة معاه في قرف بسبب الحاجات اللي بقى يشربها، أول سنة بس هو اللي كان شخص عادي وكويس معاي بعد كدا مشوفتش يوم عدل".
تابعت الزوجة: "خناق طول الوقت بسبب ضربه لي وشتيمته وسبت البيت كتير وكل مرة ببقى عايزة اتطلق خلاص بس أهلي بيقفوا ضدي وبيقولوا لي لا مش هينفع تتطلقي وكملي عشان خاطر عيالك".
ولع في الشقة وهرب
كلما نزعت الزوجة فكرة الطلاق من بالها كانت تصرفات الزوج تجبرها على العودة في التفكير الجدي في الانفصال منها أخر مرة التي حرق فيها منزل الزوجية أثناء تواجدها عند الأهل هي والأولاد، أضافت: "كل شوية كنت بسيب البيت وكنت ببقى عايزة اتطلق وأخلص منه بس أهلي هما اللي كانوا مخليني قاعدة معاه عشان مينفعش اتطلق وأنا معاي عيال، أخر مرة كنت عند أهلي غضبانة كالعادة ولقيت الجيران بتكلمني بتقول لي إلحقي بيتك بيولع".
أكملت إيمان حديثها والحسرة تعتريها: "مصدقتش إنه ممكن يعمل كدا مشيت على طول على البيت أشوف إيه اللي بيحصل ولقيت الجيران بتطفي النار والنار حرقت كل حاجة ومفيش حاجة في البيت سليمة كل حاجة اتفحمت".
دعوى خلع
اختفي الزوج في غمضة عين ولم تعرف الزوجة مكانه منذ 3 سنوات وحاولت التوصل إليه بكل الطرق ولكن كل الطرق فشلت، ما جعلها تلجأ لمحكمة الأسرة ورفع دعوى خلع لتتخلص من حياتها التي انتهت بحرق البيت وديون لصاحب البيت.
وكانت آخر كلمات إيمان في قصتها: "حرق البيت ومشي وبقالي 3 سنين في بيت أهلي مش عارفة عنه حاجة وحاولت أوصله بس مش عارفة، البيت كان إيجار ومديونة لصاحب البيت بـ 70 ألف جنيه، رفعت قضية خلع عشان أخلص منه خالص".
تابع أحدث الأخبار عبر
