منار بدعوى طلاق: «المخدرات خلته همجي أنا تعبت ومبقاش طايق لي كلمة»
سنوات ضياع مع زوج قاسي القلب وجاف في المعاملة، حيث كانت تشاور الزوجة قرار الانفصال في قرارة نفسها كل يوم ، ولكنها كانت تضع أولادها أمامها وهذا هو السبب الذي يجعلها تغض بصرها على حياتها التعيسة وتكمل في زواج غير مرضي بالنسبة لها ولكن بعد 9 سنوات كانت نفذت كل محاولاتها في التأقلم وعزمت على الطلاق بلا رجعة.
محكمة الأسرة هي التي كتبت نهاية حياة منار الزوجية ، والفرار من حياتها التعيسة الذي يزينها الجفاء والقسوة، تابعت: "كنت زي أي بنت كنت عايزة اتجوز وافتح بيت واخلف عيال وأول عريس جالي وأنا في الكلية أتجوزت على طول وهو كان باين عليه كويس".
أضافت منار: "اتخطبنا سنة وشهرين وكان كويس جدًا معيا ومحترم ومحصلش بينا مشاكل كبيرة غير المشاكل العادية، حتى ماما وبابا كانوا بيحبوه".
كنت فاكراه فارس الأحلام
"سعدت منار بخيارها الذي ظنته صائب عندما رأت معاملته معها التي تحمل الحب والاحترام كما ظنت أنها تعيش أجمل أيام حياتها معه في عش الزوجية الذي قررت أنه يكون السند ، والعوض في القفص الذهبي، تابعت الزوجة: "اتجوزنا ويدوب مكملناش شهرين ولقيت معاملته اتغيرت خالص، ومبقاش طايق لي كلمة وبقي همجي وكل ما أجي أكلمه في حاجة يتعصب علي ويضربني".
أضافت : "اتخانقنا كتير بسبب معاملته اللي اتغيرت دي وأنا مش فاهمة إيه السبب، سبت البيت كتير وكل مرة كان بيقول لي خلاص أخر مرة ومش هضربك تاني وارجع واعدي الموضوع عادي".
أكملت حديثها قائلة: "في كنا بنتخانق وعرفت السبب اللي بيخليه على طول متعصب، لقيت كيس بودرة في البنطلون وأنا بروق، ولما جيت أكلمه قالي إيه المشكلة".
أضافت: "الفكرة إن بقت العصبية تزيد والمشاكل تزيد وكل ما أتكلم معاه عشان يبطلها يقول لي مش هبطلها وأنا كدا إذا كان عاجبك، خلفت العيل الأول التاني وقلت اكيد هيتغير وهيلم نفسه عشان بنته اللي جاية في الطريق دي".
معاه فلوس يجيب مخدرات ومش معاه فلوس يجيب علبة لبن
"زاد الزوج في إدمانه الذي جعله لا يري أي شيء أمامه سوى مزاجه الذي ينفق عليه كل مرتبه الشهري دون أن يهتم لمولده الجديد ومتطلباته، أضافت منار: "زاد في القرف اللي بياخده ده ودخل في أنواع اكتر ومصايبها أكتر، ومرتبه كله بقا يضيعه على المخدرات، خلفت البنت الأخيرة دي والمشاكل زادت بسب إني مفيش فلوس أجيب حتى علبه لبن لبنتي ولما أقوله عايزة فلوس أجيب بيها لبن للبنت قالي مش معيا خدي من أمك".
انهت منار قصتها بهذه الكلمات: "جبت أخري وخلاص مش قادرة استحمل يوم واحد زيادة معاه، وسبت له البيت وروحت رفعت دعوى طلاق عليه في المحكمة وبقال لي 5 شهور ماشية في الإجراءات".