البخيل وأنا .. ولاء في دعوى نفقة: مش عاوز يطلع مليم
دعوى نفقة لجأت إليها ولاء بعد 17 عامًا من الذل والإهانة عاشتها مع زوجها. عش زوجي كان لا يمتلئ إلا بحزن نتيجة تصرفات زوجها، ما أدى لنشوب المشكلات والخلافات طوال هذه السنوات ولكن في كل مرة كان الزوج لا يتعظ ويفعل ما حلو له من ضرب وإهانة لها وللأولاد بالإضافة أنه لا يريد الإنفاق على أولاده.
ولاء في دعوى نفقة: مش عاوز يطلع مليم
"من ساعة ما اتجوزته وهو إيده طويلة ولسانه زفر"، هكذا بدأت ولاء حديثها لتروي قصتها أمام القاضي، مسطرة معاناتها التي تعيشها طيلة هذه السنوات، مضيفة: “من أول الجواز وهو بقى واحد تاني علطول شتيمه وضرب وقلة أدب معايا ومع العيال كنت بقول مش مهم بكرا يتعدل بس كل فترة بيبقى أوحش من الفترة اللي قبلها”.
تابعت “ولاء” وهي تسترجع ذكرياتها: "في فترة الخطوبة كان كويس جدًا ومبين كل المميزات ولسانه كويس معايا، وبيعمل لي كل اللي أنا عايزاه بس من ساعة ما اتجوزنا وهو تحول لواحد تاني خالص".
صبرت الزوجة على إهانتها وضربها من أجل أولادها، لكن فاض بها الكيل بعد أن تمادى الزوج في الضرب والإهانة وطلبت الطلاق لكنه رفض، فلا يريد إعطاءها مستحقاتها بعد الزواج ما جعلها تصبر عليه أطول فترة ممكنة، لا يريد إنفاق مليمًا واحدًا على أولاده ما جعلها تلجأ للقضاء وترفع دعوى نفقة.
أضافت: "ازدادت المشاكل بينا بسبب إنه بقى يضربني ضرب جامد لدرجة إنه فتحلي وداني وكسر لي صباعي قبل كدا وسبت له البيت ومشيت عند بيت أهلي واخواتي اتكلموا معاه كتير بس هو برضوا بيرجع أسوأ من الأول"
تابعت: "سابنا من سنتين ومشي وقعد سنة واحنا منعرفش هو راح فين، بس عرفت بعد كام شهر إنه عند أمه ولما كلمتها قالت لي أنا معرفش عنه حاجة وهي أصلًا اللي مخبياه عندها، لما معرفتش أوصله روحت رفعت دعوى نفقة وأول لما عرف إني رفعت القضية رجع لي وقالي هيتعدل وهصرف على العيال".
فتحلي مناخيري وكان هيموتني في إيده
تنازلت الزوجة عن القضية ووافقت على الصلح بينهم من أجل الأولاد على أمل أنه يتغير، أضافت: "أول لم عرف إني رفعت القضية رجع لي وأنا خلاص اتنازلت عن القضية ورجعت عشان خاطر العيال، بس رجع صرف على العيال شهر واتنين ورجع تاني زي الأول، وأخر مرة كنا بنتخانق فتحلي مناخيري ولما شاف منظر الدم سابنا ومشي تاني عشان خاف وبرضوا منعرفش عنه حاجة ولا بيصرف على العيال، لما عرفت إنه مش هيتغير رفعت قضية نفقة تاني بقالي شهر"، ولا تزال القضية منظورة في المحكمة حتى الآن.