أب بلا رحمة| مروة في دعوى حضانة: خد العيال عشان يعذبهم بالمكواة
هناك آباء يحملون لقب أب لكنهم لا يستحقونه بسبب انعدام الرحمة والإنسانية داخلهم، منهم من يقوم بتعذيب أبناءه دون رحمة بكل الوسائل البشعة بعد معرفته بزواج طليقته، ما دفعها لرفع دعوى ضم حضانة للحفاظ على أولادها.
مروة في دعوى حضانة: خد العيال عشان يعذبهم بالمكواة
"معندوش قلب" هكذا بدأت مروة تروي قصتها مؤكدة على انعدام الرحمة داخل طليقها، تابعت: “اتخطبنا واتجوزنا علطول عشان إحنا أرياف ومينفعش البنات تخرج في الخطوبة فمكنتش عارفاه كويس، قولت مش مهم هنعرف بعض بعد الجواز، في أول كام شهر كان كويس معايا بس بعد كدا مبقاش يصرف”.
أضافت: "كل لما بطلب منه مصاريف بيسيب لي 20 أو 30 جنيه بس ولما خلفت قولتله زود الفلوس عشان العيال يقول لي أنا مش معايا هجبلك منين مع إنه بيشتغل صنايعي ويوميته حلوة".
نشبت الخلافات بينهم بسبب رفض الزوج الإنفاق على بيته وأولاده ولكنها كانت تصبر في كل مرة إلا أن فقدت كل طاقتها وطلبت الانفصال، أضافت: "اتخانقنا كتير وسيبت له البيت وروحت عند أهلي بس في كل مرة كان بيرجعني وبيقولي هصرف بس لما بنرجع لحايتنا ألقيه برضوا زي الأول وأكتر، زهقت وطلبت منه الطلاق بس هو موافش وقالي مش هطلقك"، تابعت: "لما لقيته مش راضي يطلق رفعت قضية خلع والحمدلله، بعدها بفترة تقدم لي حد للجواز وأنا وافقت ولما عرف خد العيال غصب عني".
زوج بلا قلب
ظنت الزوجة أن طليقها يرعى أطفاله الاثنين لكن خاب ظنها، اكتشفت أنه يضربهم ضربًا مبرحًا يصل لدرجة التعذيب بمواد شديدة السخونة، تقول مروة: "تهجم عليا في بيت أهلي واتخانق معاهم خناقة كبيرة وكان هيموت اخواتي، معرفناش نخلي العيال معانا وخدهم بالعافية مني، قولت مش مشكلة هو في الأول والأخر أبوهم أكيد هيعاملهم كويس بما يرضي الله حتى لو في مشاكل معايا"
وأردفت: "حاولت أخد منه العيال كتير بس في كل مرة كان بيرفض، بس كنت بسأل عليهم وبعرف إنه بيعاملهم كويس، لما عرف إني خلاص اتجوزت بقا معاملته اتغيرت مع العيال وبقا يضربهم ليل ونهار، ولو حد طلب منه أي حاجة وبيعذبهم وبيسخن المعلقة على النار ويلسعهم بيها وبيكويهم بالمكواة"
أنهت مروة حديثها: "رفعت قضية ضم حضانة بقالي 5 شهور عشان أخد العيال عشان ميموتش حد فيهم"، ولا تزال القضية منظورة في المحكمة حتى الآن.