أخبار محكمة الأسرة اليوم
هيام لـ محكمة الأسرة: عايزنى أصرف عليه وكمان بيضربني
دعوى خلع ونفقة كانت صاحبتها «هيام» التي كان زوجها يقسو عليها طوال حياتهم سويا ولم يقدرها أو يحترمها أبدا، وتحملته الزوجة حتى لا تخرب بيتها وتدمر حياة أولادها، لكن زاد زوجها عليها في القسوة مما جعلها تلجأ لمحكمة الأسرة حتى تحمي نفسها من مستقبل ممتلئ بالألم مع زوجها.
قصص محكمة الأسرة.. بان على وشه الحقيقي بعد المسؤولية
بدأت «هيام» حديثها وقالت: «متجوزة من 2011 وخلفت من جوزي بنت وولد، رافعة قضية النفقة على جوزي من شهر 12 اللي فات، وجيت المحكمة عشان أرفع عليه قضية خلع بعد ما سيبته من شهر 8 اللي فات، أول الجواز كان كويس جدا ومحترم ومفيش منه مشاكل بس بعد سنين الجواز والخلفة والمسؤولية زاد في عمايله وبان على وشه الحقيقي ».
دعاوي محكمة الأسرة..عايزني أصرف عليه
أكملت حديثها قائلة: «سيبته بسبب مشاكل كتير بينا، لا بيشتغل ولا بيصرف وفوق كل ده بيضربني ويبهدلني، كان بيشتغل في السياحة ولما بيقعد في الشتا كان بيبقى عايز فلوس من أي مكان ويقولي ميخصنيش اتصرفي، كنت مبشتغلش وعايزني أجيب من عند أهلي ولما أقوله أنا انزل اشتغل يقولي لا، ولما معرفش أجيب فلوس من أهلي يتعصب عليا ويضربني».
حكايات محكمة الأسرة.. خفت أموت في ايده
تابعت حديثها قائلة: « استحملته كتير ضرب وشتيمة وإهانة، كل ده عشان ولادي ميتبهدلوش وبيتي ميتخربش،مكنش عندي مشكلة إنه مبيصرفش ولا الشتيمة ولا البهدلة المشكلة كانت في الضرب سيبته بسببه خفت في يوم من الأيام اموت في ايده لأنه لما بيضربني بيبقى مش شايف قدامه، في أخر خناقة ضربني بكل حاجة على راسي عشان عايز فلوس، منفصلتش عنه لسه بس سيبت البيت ومن ساعة ما مشيت مبيصرفش على العيال، لحد دلوقتي على ذمته محاولش يرجعني ده اللي خلاني أرفع الخلع».
تابع أحدث الأخبار عبر
