خلود كعب داير في محكمة الأسرة.. دخلت تجيب الشبكة اتجوزت صاحب المحل
عاشت «خلود» حياة صعبة، حيث خسرت زوجها والد طفلها وعاشت وحيدة لسنوات، وعندما ظنت أنها وجدت العوض والضهر والسند، اكتشفت أنها وقعت ضحية رجل قاسي اعتاد ضربها وخيانتها، فلم تجد أمامها سوى محكمة الأسرة حتى تحصل على حريتها.
قصص محكمة الأسرة.. جوزي مات فجأة بسكتة قلبية
قالت «خلود» في بداية حديثها: «أنا اتجوزت أول مرة بعد قصة حب من 15 سنة، وخلفت ولد واحد، جوزي كان كويس جدا ومحترم ومش مخلينا محتاجين حاجة أبدا، ومات فجأة بسكتة قلبية وكانت مفاجأة ليه؛ سابني أنا وابني لوحدنا، وأنا كنت بشتغل وبصرف عليه ومش مخلياه محتاج حاجة وعيشت حياتي عشان أربي ابني».
دعاوي محكمة الأسرة.. أمي قالتلي لازم تتجوزي تاني
أكملت «خلود» حديثها وقالت: «جوزي أبو ابني اتوفى من 10 سنين قعدت خلالهم أربي لوحدي والدنيا كانت ماشية وكله تمام، لحد ما أمي جاتلي وقالتلي عايزين نطمن عليكي ونفرح بيكي ولازم تتجوزي مش هتعيشي لوحدك، كنت رافضة في الأول عشان ابني، بس بعد كدة وافقت، وفعلا اتقدملي عريس كويس ومحترم ومناسب ووافقت عليه وكنا هنتجوز».
حكايات محكمة الأسرة.. اتجوزت في شهر واحد بس
تابعت «خلود» حديثها قائلة: «واحنا بنشتري الشبكة كان فيه واحد بيقول على نفسه صاحب المحل قعد يبص لي ويعاكسني والعريس اللي كان معايا اتضايق من النظرات ساعتها، وبعد كدة محصلش نصيب بيني وبين العريس وسيبنا بعض بسبب أسلوبه وطريقته ففكرشت الخطوبة، ورحت أبيع الدبلة في نفس المحل، ولما رحت نفس الراجل قالي أنا عايز اتجوزك واتجوزنا فعلا في شهر واحد بس».
قضايا محكمة الأسرة.. أهله مش عايزني عشان أصغر مني
أنهت «خلود» حديثها قائلة: «قعدت معاه 3 سنين بس، حسيت طول الوقت إن فيه حاجة بتحصل من ورايا غلط شاكة بس مفيش دليل معايا، كان على طول بيتكلم في التليفون مستخبي وكنت بكبر دماغي عشان معملش مشاكل ولا اخرب بيتي، بس هو كان باين إنه بيخوني، لحد ما واحدة من اللي يعرفهم جت البيت تسأل عليه ولما واجهته وقلتله مينفعش اللي بيعمله ده قالي ده اللي عندي إذا كان عاجبك، حاولت اشتكي لأهله عشان يحلوا الموضوع لكن مفيش فايدة مكانوش عايزني لأنهم كانوا عايزينه يتجوز واحدة قريبته ولأنه كان أصغر مني، ولما لقيته مش هيتعدل رفعت عليه قضية خلع».
تابع أحدث الأخبار عبر
